Dili, 1 Juñu 2026

Vise-Primeiru-Ministru (V-PM), Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Francisco Kalbuadi Lay, simu vizita Kortezia delegasaun altu nível husi Reinu Kamboja, ne’ebé lidera husi Ministru Postu no Telekomunikasaun, Dr. Chea Vandeth, hodi koalia kona-ba kooperasaun bilaterál entre Timor-Leste no Kamboja, Segunda semana nee iha Gabinete, Farol, Díli.

Durante reuniaun ho delegasaun ne’e, parte rua diskute kona-ba oportunidade estratéjiku sira atu hametin liután relasaun amizade no kooperasaun bilaterál entre Timor-Leste no Kamboja, liuliu iha área ekonomia, transporte, ligasaun aérea, turizmu, komérsiu, no investimentu. Iha fatin hanesan, delegasaun Kamboja mós fahe esperiénsia susesu nian kona-ba dezenvolvimentu setór estratéjiku sira ne’ebé kontribui ona ba sira-nia kreximentu ekonómiku.

Tuir Vise-PM, Francisco Kalbuadi Lay, subliña katak vizita delegasaun Kamboja nian ne’e reprezenta pasu importante ida ba reforsu relasaun bilaterál ne’ebé metin ona entre nasaun rua.
“Ministru Komunikasaun Kamboja nian mai vizita Timor-Leste atu haree no hametin kooperasaun, liuliu iha área dijitál. Ha’u hato’o kongratulasaun ba Ministériu Transporte no Komunikasaun tanba konsege ona hakat pasu ida ba oin, liuliu iha setór dijitál nian. Ida-ne’e hatudu katak Timor-Leste la’o daudaun ba oin iha transformasaun dijitál, hanesan ezemplu prátiku kona-ba sistema dijitalizasaun ba karta kondusaun (driver licence) no mós rejistu ba veíkulu sira,” dehan Vise-Primeiru-Ministru.

Nia mós hatutan katak relasaun entre Timor-Leste no Kamboja sai espesiál liután tanba ligasaun amizade ne’ebé boot no kle’an entre líder istóriku sira nian husi nasaun rua.
“Timor-Leste no Kamboja iha relasaun ne’ebé di’ak tebes. Eis Primeiru-Ministru Kamboja, Hun Sen, mak belun di’ak ida ba Prezidente Repúblika, Dr. José Ramos-Horta, no ba Primeiru-Ministru, Kay Rala Xanana Gusmão. Tanba ne’e, Kamboja kontinua hatudu nia kompromisu hodi fó apoiu ba Timor-Leste, liuliu iha área téknika no kapasitasaun rekursu umanu,” nia deklara.

Vise-Primeiru-Ministru akresenta katak kooperasaun bilaterál ne’e sei luan mós ba setór importante seluk ne’ebé sai pilar ba dezenvolvimentu nasionál, inklui edukasaun.
“Iha momentu ida-ne’e, kooperasaun la’ós de’it limits ba área dijitalizasaun nian. Delegasaun Kamboja mós sei hala’o enkontru ho Ministra Edukasaun atu avalia oportunidade no dezafiu sira ne’ebé Kamboja bele apoia Timor-Leste, liuliu iha dezenvolvimentu teknolojia no dijitalizasaun iha setór edukasaun nian. Ha’u fiar katak, iha futuru, kooperasaun entre nasaun rua sei buras no fó rezultadu di’ak liután,” konklui Vise-PM.

Durante iha enkontru ho Vise-Primeiru-Ministru nian ne’e, akompañadu husi Koordenadór Jerál (MKAE), Sr. Jorge Rui Carvalho Martins no Ministru Transporte no Komunikasaun (MTK), Miguel Marques Gonçalves Manetelu, hamutuk ho Prezidente Autoridade Turismu Timor-Leste, Instituto Públiku (ATTL), Sr. Virgílio Smith no ekipa téknika sira, nunee, mos delegasaun ofisiál husi Kamboja ne’e kompostu husi, Sekretáriu Estadu Ministériu Postu no Telekomunikasaun, Haksokheng, Sekretáriu Jerál DGC, Chea Sereyvath, Diretór Jerál MPTC, Sam Sethserey no Embaixador Estraordináriu no Plenipotensiáriu Reinu Kamboja nian ba Timor-Leste, CHUN Sovannarith.