Tersa, 14 Jullu 2026.

Vise-Primeiru-Ministru, Ministru Koordenadór bá Asuntu Ekonómiku (MKAE) no Ministru Turizmu no Ambiente (MTA), Sr. Francisco Kalbuadi Lay, partisipa iha serimónia entrega ofisiál viatura modernu rua ba limpeza ho alta presaun no saneamentu ba Sentru Nasionál Empregu no Formasaun Profisionál (CNEFP)-Tibar ne’ebé entrega husi Kompañia KANSEI, akompaña ho demonstrasaun téknika kona-ba maneira operasaun no utilizasaun ekipamentu ne’ebé hala’o iha Palásiu Prezidensiál, Bairru-Pité, Díli, Tersa, 14 Jullu 2026.

Serimónia entrega ofisiál viatura ne’e hetan partisipasaun husi Prezidente Repúblika, José Ramos-Horta, nu’udar parte husi esforsu atu hametin kapasidade institusionál CNEFP, liuliu iha área manutensaun, limpeza no saneamentu, hodi garante ambiente formasaun ne’ebé moos, seguru no saudável.

CNEFP-Tibar apresia apoiu no kooperasaun husi Kompañia KANSEI, no iha nia kompromisu atu utiliza no mantein ekipamentu ne’e ho responsabilidade, hodi asegura benefísiu sustentável ba instituisaun no komunidade formasaun profisionál. Durante demonstrasaun téknika, ekipa husi Kompañia KANSEI esplika no demonstra diretamente funsaun, mekanizmu operasaun, prosedimentu seguransa no manutensaun bázika ba viatura no ekipamentu saneamentu.

Atividade ne’e importante atu garante katak operadór sira bele uza ekipamentu ho loos, seguru no efisiente. “Entrega viatura ne’e ba CNEFP hanesan parte ida hodi dezenvolve Timor-Leste liuhusi formasaun ba Timoroan sira atu hasa’e sira-nia abilidade iha área profisionál sira,”esplika Prezidente Kompañia KANSEI, Kenzy Hasegawa. Entrega viatura modernu ne’e reprezenta pasu importante ida hodi hasa’e kapasidade operasionál iha área limpeza no saneamentu, liuliu atu apoia servisu limpeza no manutensaun infraestrutura públika ho maneira ne’ebé efisiente, seguru no modernu.

Liuhusi diskursu badak, Vise-PM, MKAE no MTA, Dato’ Seri Francisco Kalbuadi Lay, hatete, hodi Governu nia naran hato’o agradese wain ba Governu Japaun no Kompañia KANSEI ne’ebé apoia ona ekipamentu modernu sira ne’e ba CNEFP-Tibar. Nune’e kompromisu Governu nian mak kontinua promove dezenvolvimentu infraestrutura no hadi’a kualidade servisu públiku, liuliu iha área saneamentu, limpeza no protesaun ambientál.

Viatura moderna rua ne’ebé Kompañia KANSEI fó doasaun ba CNEFP-Tibar ne’e kompostu husi kamiaun tiru-bee ho presaun a’as no kamiaun supa tahu-foer. Veíkulu hirak ne’e uza atu hasai sedimentu hanesan tahu, rai-henek no bee-foer sira ne’ebé akumula iha kanu bee-foer, kanu udan-ben nian no baleta sira iha estrada ninin nune’e bele normaliza fali drenajen hanesan baibain.