DILI, 03 Julhu 2026

Ministru Koordenadór ba Asuntu Ekonómiku (MKAE), liu husi Koordenadór Jerál Sr. Jorge Rui de Carvalho Martins, hala’o enkontru koordenasaun ho xefe no diretór/a sira husi ajénsia tutelada hotu-hotu iha MKAE, ho objetivu atu garante efikásia no sinkronizasaun ba programa servisu sira. Enkontru ne’e realiza iha Salaun Enkontru IQTL, Bebora, Dili.

Enkontru ne’ebé dirije diretamente husi Koordenadór Jerál, hodi halo avaliasaun ba progresu implementasaun Planu Asaun Anuál (PAA), no diskute dezafiu sira ne’ebé instituisaun ida-idak hasoru iha terrenu, hodi hametin mós integrasaun no sinergia entre Ministru no ajénsia tutelada sira.

Iha enkontru ne’e, Koordenadór Jerál Sr. Jorge Rui de Carvalho Martins hato’o katak asuntu importante ida atu hanoin hamutuk maka polítika Orsamentu Jerál do Estadu (OJE) 2027, tuir rezultadu enkontru sira ho Ministériu Finansas no ho Komisaun Funsaun Públika kona-bá reforma estruturál no administrativa.
Koordenadór Jerál esplika katak diskusaun kona-bá OJE 2027 la foka ba kategoria orsamentu sira nia rasik nomeadamente bens servisu, saláriu no vensimentu, transferénsia públiku, kapitál menor no kapitál dezenvolvimentu — maibé foka liu ba polítika prioridade Governu nian.

Koordenadór Jerál hatutan mós katak, iha kontestu preparasaun ba enkontru ASEAN, MKAE hamutuk ho Koordenadór OMK no Unidade SUEI kontinua buka formula atu involve instituisaun sira iha tópiku sira hanesan Institutional Building, SPS, TBT, Komérsiu Elektróniku no asuntu ajénsia sira seluk.
“Ita labele la’o ketak-ketak. Atu alkansa meta sira ne’ebé Governu hateten ona, ajénsia tutelada hotu tenke iha koordenasaun ne’ebé metin, hodi nune’e bele garante prestasaun servisu ne’ebé di’ak no ho kualidade aas ba públiku,” afirma Koordenadór Jerál Sr. Jorge Rui de Carvalho Martins.

Durante sesaun diskusaun, ajénsia tutelada sira ne’ebé partisipa maka TradeInvest, IQTL, SERVE, I.P., Bambu Tibar, CNFP Bekora, CNFP Tibar, IGT, CCD, AIFAESA, IADE, INDMO no CLN. Ajénsia sira-ne’e mós aprezenta relatóriu ezekusaun orsamentál no planu estratéjiku ba trimestre tuir-mai. Enkontru ne’e foka mós ba oinsá optimiza rekursu umanu no finanseiru ne’ebé disponivel, hodi evita impaktu negativu ba kualidade servisu.

Alende sorumutu ne’e, Koordenadór Jerál MKAE realiza mós serimónia solene Lansamentu Primeira Pedra (tau fatuk dahuluk), hodi marka inísiu ba obra dezenvolvimentu Laboratóriu Food and Beverage ho andár ida (1 lantai), ne’ebé sei harii iha Bebora, Dili. Projetu foun ne’e bazeia ba vizaun atu hametin kualidade, seguransa no padronizasaun aihan no bebidas iha rai-laran, no sei konstrui husi kompañia REGULELSO UNIPESSOAL, LDA ho montante valor orsamnetu $ 98,643.00, durasaun kontratu fulan ne’en (6).