DILI, 27 Jullu 2026 –

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Meiu Ambiente, liuhusi Koordenadór Jerál (MKAE) Sr. Jorge Rui de Carvalho Martins, hamutuk ho delegasaun sira, halo enkontru ho United Nations Sustainable Development Cooperation Framework (UNSDCF) iha sala reuniaun Kofi Annan Room, UN House, Caikoli, Dili.

Objetivu prinsipál husi enkontru ne’e mak atu forma ekipa téknika ida husi liña ministériu relevante sira hamutuk ho parseiru dezenvolvimentu sira, hodi prepara Komité Diresaun Konjunta (Joint Steering Committee).

Enkontru ida-ne’e serve nu’udar meiu ida atu hametin koordenasaun inter-institusionál, halo revizaun ba progresu servisu nian, no prepara ajenda no dokumentu xave sira ne’ebé sei aprezenta iha enkontru altu nivel Komité Diresaun Konjunta nian tuirmai.
Papél ministériu sira-nian importante tebes atu garante katak programa no inisiativa hotu ne’ebé kobre iha área rezultadu (outcome areas) UNSDCF nian la’o tuir prioridade dezenvolvimentu nasionál no fó impaktu pozitivu ba povu Timor-Leste.

Revizaun Progresu, Avalia rezultadu servisu tékniku ne’ebé hala’o tiha ona iha nível operasionál hodi hatur baze ba foti desizaun estratéjika.
Preparasaun Ajenda, Finaliza ajenda husi enkontru Komité Diresaun Konjunta nian hodi fasilita parseria ne’ebé efetivu no ho impaktu boot ba komunidade.

Aliñamentu Estratéjiku, Ministériu tékniku sira sai pontu fokal ba parseria ho ajénsia UN sira ba área sira hanesan saúde, edukasaun, dezenvolvimentu ekonómiku, governasaun, no mudansa klimátika.
Garante Sustentabilidade, Liuhusi lideransa téknika husi ministériu sira, implementasaun pilar UNSDCF nian sei hametin kapasidade institusionál iha rai-laran no fasilita alkansa Objetivu Dezenvolvimentu Sustentável (ODS).
Koordenasaun Multisetoriál, Integrasaun téknika ne’e sei ajuda hodi hasa’e efisiénsia servisu públiku no haruka rekursu sira ba grupu benefisiáriu ne’ebé presiza liu.