DILI, 18 Maiu 2026 –

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, akompañia Primeiru-Ministru, Kay Rala Xanana Gusmão, hodi partisipa iha Serimónia Ritual Kultura nian antes hodi hahú projetu konstrusaun ba Sentru Konvensaun Internasionál (ICC), iha Portu Dili. Lansamentu ofisiál ba projetu boot ne’e sei hala’o iha loron 20 fulan-Maiu 2026.

Serimónia ritual tradisionál ne’e sai nu’udar parte importante ida husi kultura no identidade povu Timor-Leste nian. Serbisu ne’e hala’o ho objetivu atu husu lisensa no bensaun husi rai-na’in no avó sira, nune’e projetu dezenvolvimentu ne’e bele la’o ho di’ak, seguru, no lori benefísiu boot ba povu no nasaun tomak.

Iha biban ne’e, IX Governu Konstitusionál ne’ebé lidera husi Primeiru-Ministru, Kay Rala Xanana Gusmão, konvida Lia-na’in husi Aileu Mota-Ain, Karketu, Rogério Rodrigues Saldanha, hodi dirije hamulak. Serbisu lulik ne’e halo ho sentimentu katak, molok atu hahú konstrusaun boot ne’e, lia-na’in sira tenke mai hamutuk iha fatin ne’e hodi hases tiha enerjia negativu hotu, nune’e prosesu konstrusaun bele la’o ba oin ho susesu to’o remata.
Konsidera katak natureza iha Timor-Leste bele fó dezafiu sira hanesan inundasaun no seluk tan , serimónia ritual kultura ne’e mós inklui ritual oho manu no fahi.

Liuhusi hare ba manu no fahi nia urat, rezultadu hatudu sinál pozitivu no la iha sinál negativu ruma. Sinál husi manu nia ain-loos no ain-karuk hatudu katak sei la akontese buat aat ruma. Nune’e mós ba fahi nia urat, maske iha fahi nia nanál iha sanak uitoan, maibé ne’e reprezenta de’it símbolu ne’ebé sei tara iha nia fatin. Sinál sira-ne’e hotu fó garantia katak, maske iha tempu udan boot ka rai-lakan, prosesu konstrusaun sei la’o nafatin ho di’ak.

Projetu konstrusaun Sentru Konvensaun Internasionál (ICC) ne’e sei implementa no ezekuta husi Kompañia Shaanxi Construction Group Corporation.