Dili- 08 fulan Maiu 2026______
Gabinete Ministru Koordenadór Asuntu Ekonómiku, liuhusi Koordenadór Jerál, Jorge Rui de Carvalho Martins, prezide enkontru Komité Tékniku hodi halo avaliasaun ba planu negósiu no proposta investimentu ne’ebé submete husi EMG-MRT Ilimanu, Lda no Timorock Eco-Solutions Unipessoal, Lda. Enkontru ne’e hala’o iha salaun enkontru TradeInvest iha loron-sesta semana kotuk.
Enkontru ne’e ho objetivu atu hala’o avaliasaun téknika ba proposta investimentu sira tuir rekizitu ne’ebé estabelese tuir Lei Investimentu Privadu (Lei No. 15/2017), partikularmente atu determina elejibilidade ba Deklarasaun Benefísiu (DB) no Akordu Investimentu Espesiál (ASI).
Iha sesaun nee, Koordenadór Jerál subliña katak Komisaun Téknika harii liuhosi Dekretu-Lei hodi fó apoiu ba implementasaun efetivu Lei Investimentu Privadu no hametin klima investimentu iha Timor-Leste. Nia hatutan liu tan katak IX Governu Konstitusionál oras ne’e halo hela revizaun ba enkuadramentu legál nasionál ba protesaun investimentu hodi nune’e bele introdús reforma sira ne’ebé reforsa konfiansa investidór no kria ambiente negósiu ne’ebé kompetitivu liu.
“To’o ohin loron, ita hetan ona rezultadu pozitivu ne’ebé signifikante, ho investimentu balun hahú ona atu materializa. Ekipa ne’e forte no profisionál tebes. Ha’u kontinua informa ba Vise-Primeiru-Ministru no Primeiru-Ministru kona-ba efikásia no efisiénsia husi servisu setoriál ne’ebé hala’o daudaun. Investidór sira ne’ebé mai Timor-Leste mak sira ne’ebé iha kapasidade finanseira no iha kompromisu sériu,” tenik Jorge Rui de Carvalho Martins.
Koordenadór Jerál mós realsa katak mekanizmu fasilitasaun investimentu bazeia ba koordenasaun integradu entre MKAE, TradeInvest Timor-Leste, Ministériu Justisa, no liña ministériu relevante sira ne’ebé fó rekomendasaun téknika. Mekanizmu koordenadu ida-ne’e hatudu ona katak efetivu hodi presta funsaun sentrál tolu: Esperansa hosi Desizaun Sertifikadu nian, Avaliasaun ba Kualifikasaun Investimentu nian, no negosiasaun hosi Akordu Investimentu Espesiál nian.
Inisiativa ida ne’e aliña ho IX Governu Konstitusionál nia programa kona-ba diversifikasaun ekonómika no reforsu setór privadu nu’udar pilár xave ba dezenvolvimentu nasionál.
“MKAE la’ós la’o mesak ;ita-nia papél atu integra vizaun ministériu hotu-hotu nian iha enkuadramentu polítiku no ekonómiku koordenadu ida de’it,” nia akresenta. Proposta Investimentu sira ne’ebé aprezenta maka EMG-MRT Ilimanu, Lda
Joint venture ida entre Elegant Marble Group, Lda (51%) no Murak Rai Timor, E.P. (49%), aprezenta proposta investimentu ida ho valór USD 51 milloens hodi estabelese plataforma indústria mármore integradu iha Uma Kaduak, Lacumesac, no Iliheu, ne’ebé lokaliza iha Munisípiu Manatuto.
Timorock Eco-Solutions Unipessoal, Lda empreza ida ne’ebé totalmente timoroan mak na’in, hato’o proposta investimentu ida ho valór USD 4,95 milloens. Liuhusi Empreza Fatukura, Lda, projetu ne’e ho objetivu atu estabelese unidade prosesamentu foun ba tijolu pilotu “Eco-Fabrika” no dezenvolve inovasaun estabilizasaun rai uza teknolojia ne’ebé amigavel ba ambiente iha distritu Cacussa no Osleu, Postu Administrativu Cristo Rei, Munisípiu Dili.
Enkontru ne’e partisipa husi reprezentante sira husi MPIE, ANM, I.P., TradeInvest Timor-Leste, SERVE, I.P., no reprezentante tékniku sira husi liña ministériu relevante ne’ebé integra iha Komisaun Téknika.
