Dili, 15 Setembru 2026

Ministru Koordenadór ba Asuntu Ekonómiku (MKAE) liu husi Gabinete Koordenadór Jerál, Sr. Jorge Rui de Carvalho Martins, partisipa iha semináriu ho tema “Prevensaun Risku Administrativu”, ne’ebé organiza husi Sentru Lojístika Nasionál (CLN) iha Salaun Laline CNE, Colmera.

Semináriu ne’e ho objetivu atu previne risku administrativu sira no kria enkuadramentu legál husi parte jurídika hodi sai fundamentu ba administrasaun públika ho responsabilidade atu servisu ba interese públiku.

Koordenadór Jerál MKAE hateten katak, iha vida funsionamentu públiku, desizaun ida-idak bele lori risku administrativu. Dala ruma bainhira ukun, senti bele foti desizaun ne’ebé hanehan ema seluk, no dala ruma funsionáriu sira senti ida-ne’e nu’udar privilejiu boot ida atu halo kualker meios iha atendimentu públiku.

“Interese públiku tenke sai ita-nia responsabilidade másima, liu-liu iha utilizasaun no jestaun ba propriedade no orsamentu ba interese públiku, la’ós ba interese pesoál,” dehan Sr. Jorge Rui de Carvalho Martins.

Koordenadór Jerál haktuir tan katak, komprende lei, kumpri prosedimentu, dokumenta desizaun, garante transparénsia, evita konflitu interese, no respeita separasaun kompeténsia mak parte importante husi prevensaun risku administrativu. Legalidade mak mekanizmu seguransa atu garante mákina Estadu la’o ho di’ak.

Koordenadór Jerál bolu atensaun ba partisipante hotu katak servisu tuir lei la’ós tanba tauk kastigu, maibé tanba iha responsabilidade ba Estadu no povu. Atu harii administrasaun públika ne’ebé seguru, responsável, transparente, efisiente, no dignu ba konfiansa povu nian,

Identifika risku sira antes foti desizaun, Konsulta ho parte kompetente sira bainhira iha dúvida, Dokumenta prosesu hotu-hotu ho rigor, Fahe responsabilidade tuir kargu ne’ebé iha, La uza autoridade públika ba interese pesoál, maibé foka de’it ba interese públiku.

Koordenadór Jerál subliña katak responsabilidade ohin loron la’ós de’it atu jere administrasaun, maibé tenke proteje integridade husi mákina Estadu no garante katak nia funsiona di’ak ba jerasaun ohin no futuru.

Hotu-hotu sai husi semináriu ne’e ho responsabilidade boot katak povu no interese públiku mak sai faktór no responsabilidade maijór iha administrasaun públika.