𝟏𝟕 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Koordenadór Jerál MKAE Sr. Jorge Martins akompaña Vise-Primeiru-Ministru, Ministru Koordenadór bá Asuntu Ekonómiku (MKAE) no Ministru Turizmu no Ambiente (MTA), Francisco Kalbuadi Lay, hala’o audiénsia ho Komisaun C Parlamentu Nasionál, ne’ebé trata asuntu Finansas Públikas, hodi diskute no fó esplikasaun kona-bá Proposta Lei Nú. 29/VI(3a), Rejime Jerál Taxa Administrativa.
Iha audiénsia ho Komisaun C Parlamentu Nasionál ne’e hetan mós partisipasaun husi Sekretáriu Esatadu Peskas, Domingos da Conceição dos Santos, Sekretáriu Estadu Floresta, Fernadino Vieira, no Sekretáriu Esatadu Kooperativa, Arsénio Pereira.

Diskusaun ne’e nu’udar parte husi prosesu apresiasaun lejizlativa Parlamentu Nasionál kona-bá proposta lei ne’ebé sei estabelese prinsípiu no regra jerál ba aplikasaun, dezeñu no kolesaun taxa administrativa iha Timor-Leste. Komisaun C mós hahú prosesu audiénsia ho entidade relevante sira atu rona perspetiva no rekomendasaun antes prosesu lejizlativu kontinua.
Iha audiénsia ne’e, Vise-Primeiru-Ministru liuhusi intervensaun fó esplikasaun kona-bá objetivu

Governu iha elaborasaun proposta lei, liuliu atu hametin baze legál, aumenta transparénsia no uniformiza sistema taxa administrativa iha instituisaun públika sira.
“To’o ohin loron, Timor-Leste seidauk iha rejime jerál ida kona-ba taxa administrativa ne’ebé estabelese ho forma sistemátika. Iha tempu liubá, instrumentu lejislativu no reguladór oioin estabelese ona kobransa taxa iha área no servisu públiku oioin.

Maibé, falta baze jerál ida bele hamosu diferensa iha regra, prosedimentu no forma kobransa, no bele mos hamosu incerteza ba sidadaun, empresa no própria Administrasaun Públika.
Tanba ne’e, proposta lei ida-ne’e importante tanba estabelese prinsípiu no regra jerál ne’ebé klaru, konsistente, transparente no previsível ba kriasaun no kobransa taxa administrativa.

Ba sidadaun no setor privadu, ida-ne’e signifika katak sira bele hatene ho klaru tanba sá taxa ida aplika, hira mak tenke selu, oinsá atu selu, no saida mak sira nia direitu bainhira iha desizaun administrativu ne’ebé sira konsidera la loos. Ba Administrasaun Públika, rejime ida-ne’e bele ajuda hametin jestaun reseita naun-tributária, no mós hadi’a mekanizmu kontrolu, auditoria no responsabilizasaun iha prosesu kobransa no jestaun reseita.

Husi perspetiva ekonómika, ita presiza haree taxa administrativa ho kuidadu. Taxa la’ós de’it kona-ba reseita Estadu; taxa mós iha impaktu direta ka indireta ba kustu halo negósiu, investimentu, produsaun no kompetitividade.

1 Taxa tenke iha relasaun ho servisu ka atuasaun administrativu ne’ebé Estadu fornese, no tenke justu, razoável no proporsionál. Bainhira iha taxa ne’ebé aas liu, duplikasaun, prosedimentu repetitivu ka kustu administrativu ne’ebé la nesesáriu, situasaun ida-ne’e bele aumenta kustu ba empreza no sidadaun, liuliu ba micro, kiik no mediu empresas (MKME).

Husi perspetiva jurídika, Governu kompriende katak proposta lei ida-ne’e bele hamosu diskusaun no konsiderasaun téknika, liuliu kona-bá kompeténsia Parlamentu no Governu iha kriasaun taxa no determinasaun sira-nia valór.

Kestaun sira-ne’e importante no merese atu analiza ho kuidadu, ho rigór tékniku no ho konsiderasaun ba Konstituisaun no sistema jurídiku nasionál. Governu sei kontinua disponível atu partisipa iha diálogu nakloke no konstrutivu ho Komisaun no Deputadu sira atu hadi’a dispozisaun sira ne’ebé presiza.
Iha kontestu ida-ne’e, Artigu 16 merese atensaun espesial, tanba regula elementu fundamentál sira iha kriasaun taxa, inklui baze insidénsia, fórmula kalkulasaun, izensaun, modalidade pagamentu, garantia no regra kobransa.
Husi perspetiva MKAE, importante katak elementu sira-ne’e bele asegura transparénsia no previsibilidade, no mós permite atu avalia se taxa proposta iha justifikasaun ne’ebé apropriadu no proporsionál ho servisu ka atuasaun administrativu ne’ebé fornese.

Iha nivel prinsipál, Governu konsidera katak Timor-Leste presiza iha Rejime Jerál Taxa Administrativa ida. Detalhe jurídiku no tékniku sira bele kontinua debate no hadi’a durante faze espesializada, maibé importante atu iha baze komún ida ne’ebé bele orienta Administrasaun Públika no fó seguransa jurídika ba sidadaun no setor privadu.

Tanba ne’e, husi perspetiva MKAE, ami fó pareser favorável iha prinsipiu ba proposta lei ida-ne’e, ho rekomendasaun atu durante prosesu espesializada, ita kontinua konsidera aspetu jurídiku, proporsionalidade, justifikasaun ekonómika, impaktu ba kustu halo negósiu no kompatibilidade ho kompromisu internasionál Timor-Leste.

Ami fiar katak liuhusi diálogu konstrutivu entre Parlamentu no Governu, proposta ida-ne’e bele hadi’a no lori ba estabelesimentu sistema ida ne’ebé 2 klaru, justu, transparente no responsável, ne’ebé bele fó benefísiu ba Estadu, sidadaun, setór privadu no dezenvolvimentu ekonómiku nasionál. Tanba ne’e, bainhira kria ka reve taxa administrativa, ita presiza konsidera la’ós deit ninia nesesidade no justifikasaun, maibé mós haree ninia impaktu ba atividade ekonómika.

Bainhira apropriadu, Avaliasaun Impaktu Regulatóriu bele sai instrumentu ida atu ajuda Governu analiza impaktu sira-ne’e antes desizaun foun halo. Iha tempu hanesan, ita tenke asegura katak sistema taxa administrativa kompatível ho obrigasaun no kompromisu internasionál Timor-Leste ninian, inklui iha World Trade Organization no ASEAN.

Taxa administrativa labele uza nu’udar barreira indireta ba komérsiu. Atensaun espesial mós presiza fó ba matéria-prima, makina, ekipamentu no input produtivu sira, tanba kustu administrativu ne’ebé la nesesáriu bele aumenta kustu produsaun no afeta kompetitividade husi produtu nasionál.

Distintu Deputadu sira, MCAE ninia hanoin katak, ita nia abordagem bele resume ho lójika simples: servisu públiku di’ak lori ba taxa ne’e bé justu; taxa ne’ebé justu no transparente ajuda hamenus kustu halo negósiu; kustu ne’ebé menus aumenta konfiansa; konfiansa ajuda atrai investimentu; investimentu aumenta produsaun no produtividade; produsaun ne’ebé kompetitivu aumenta oportunidade esportasaun; no hotu-hotu ne’e bele kontribui ba empregu no kreximentu ekonómiku sustentável Timor-Leste.

Nune’e, sistema taxa administrativa tenke haree hanesan parte ida husi ambiente negósiu no sistema governasaun ne’ebé di’ak, no la’ós simplesmente hanesan instrumentu atu aumenta reseita,”dehan Vise-PM, Dato’ Seri Francisco Kalbuadi Lay, iha sala plenária Parlamentu Nasionál, Kinta, 17 Setembru 2026.

Vise-PM, MKAE no MTA, esplika, kona-bá taxa ne’ebé atu aplika atu hetan to’o hira deit seidauk bele sustenta Orsamentu Jerál Estadu, maibé presiza mós hahú tanba tempu la’o beibeik ba oin entaun presiza implementa mós taxa ida ne’e.
Proposta lei ne’e mós buka atu define prinsípiu klaru kona-bá determinasaun no kolesaun taxa, inklui konsiderasaun ba izensaun ka fasilidade ba sidadaun sira ne’ebé iha limitasaun ekonomia atu selu taxa.

Diskusaun ho Komisaun C fó oportunidade ba Governu no Parlamentu Nasionál atu aprofunda aspetu tékniku no jurídiku sira, inklui impaktu proposta lei ne’e ba administrasaun públika no asesu sidadaun sira ba servisu públiku.

Objetivu prinsipál mak atu garante kolesaun taxa administrativa la’o tuir regra ne’ebé klaru no uniforme, ho konsiderasaun ba kondisaun sidadaun sira no nesesidade atu asegura asesu ekitativu ba servisu públiku.