Filipina 4- Maiu-2026
Gabinete Ministru Koordenadór Asuntu Ekonómiku, liuhosi Unidade Estratéjia Integrasaun Ekonómika (SUEI), ne’ebé reprezenta hosi Koordenadór Leonito Soares de Jesus, partisipa iha Konferénsia Anuál Rede Kompetisaun Internasionál (ICN) 2026 ne’ebé hala’o iha Filipina hosi loron 5–8 Maiu 2026.
Konferénsia ne’e halibur autoridade kompetisaun, polítiku no peritu sira hosi mundu tomak hodi troka prátika di’ak sira no hametin kooperasaun hodi promove merkadu sira ne’ebé justu no kompetitivu ba dezenvolvimentu ekonómiku sustentável.
Timor-Leste nia partisipasaun marka xave ida hodi hametin governasaun ekonómika no avansa ambiente negósiu ne’ebé transparente no kompetitivu. Ida-ne’e tuir aprovasaun foin lalais ne’e ba Lei Kompetisaun Timor-Leste nian, ne’ebé dezenvolve ho apoiu hosi UNCTAD, no apoia preparasaun sira ne’ebé la’o daudaun ba estabelesimentu autoridade nasionál kompetisaun nian.
Durante konferénsia ne’e, reprezentante MKAE hala’o enkontru bilaterál ho ofisiál superiór no delegasaun sira husi Austrália, Nova Zelándia, Filipina, Portugál, Guatemala, Gambia, Aruba, Fiji, no Bangladexe, no mós peritu polítika kompetisaun globál.
“Onra boot ida reprezenta Timor-Leste iha ICN ba dala uluk.Plataforma ida ne’e permite ita hodi fahe ita-nia progresu kona-ba Lei Konkorénsia no ita-nia preparasaun hodi estabelese autoridade konkorénsia nasionál, enkuantu aprende husi prátika di’ak internasionál sira,” dehan reprezentante SUEI/MKAE ne’e.
Nu’udar membru foun ASEAN no Organizasaun Mundiál Komérsiu (OMK), Timor-Leste kontinua hametin ninia integrasaun iha ekonomia rejionál no globál, hatudu ninia kompromisu ba dezenvolvimentu inkluzivu no sustentável liuhosi instituisaun sira ne’ebé forte ho kooperasaun internasionál.
