MKAE ASINA KONTRATU HO GRUPU BENEFISIÁRIU SIRA

DÍLI, 21 Outubru 2026

Ministru Koordenadór ba Asuntu Ekonómiku (MKAE), liuhosi Gabinete Koordenadór Jerál, Sr. Jorge Rui de Carvalho Martins, partisipa iha serimonia Asina akordu ho grupu benefisiariu sira. 

Serimónia ne’e hala’o ho objetivu atu fó apoiu ba grupu benefisiáriu sira, hametin kooperasaun entre Governu no setor privadu, no promove atividade sira ne’ebé bele kontribui ba dezenvolvimentu ekonómiku no sosial iha Timor-Leste.

Asinatura kontratu ne’e mós sai parte husi esforsu Governu atu haforsa kapasidade grupu benefisiáriu sira, haburas inisiativa privadu no kria oportunidade ba dezenvolvimentu sustentável iha komunidade sira.

“Iha fulan hirak liubá, ami halo komunikasaun no diskusaun internál kona-ba limitasaun finanseira no gastus públiku. Depois de halo revizaun no konsultasaun ho parte relevante sira, Governu sei kontinua buka solusaun ne’ebé bele fó apoiu ba grupu benefisiáriu sira to’o mandatu remata,” hateten Koordenadór-Jerál MKAE.

Koordenadór-Jerál MKAE mós subliña katak progresu ne’ebé atinji ona presiza kontinua ho esforsu hamutuk entre Governu, instituisaun finanseira no setor privadu, atu bele hadi’a kondisaun no apoiu ba atividade ekonómika sira.

“Governu no setor privadu tenke servisu hamutuk atu haforsa dezenvolvimentu ekonómiku nasaun nian. Governu sei kontinua fó apoiu tuir nia kapasidade, maibé setor privadu mós tenke sai ajente importante no lider iha dezenvolvimentu ekonómiku,” nia hatutan.

Koordenadór-Jerál MKAE mós temi katak, maski nasaun sei depende nafatin ba reseita públika, presiza haforsa setor privadu atu, iha futuru, bele lidera no sustenta dezenvolvimentu ekonómiku nasional.

Nia hateten tan katak diskusaun, opiniaun no rekomendasaun ne’ebé sai husi diálogu entre parte sira sei kontinua sai referénsia importante ba dezenvolvimentu politika no programa Governu nian.

Iha serimónia ne’e, mós marka prezensa Vice-Prezidente CCITL, Prezidente ACCTO, reprezentante AMTL no membru sira husi grupu Feto Haburas Turizmu.