DÍLI, 6 Outubru 2026 Ministru Koordenadór ba Asuntu Ekonómiku (MKAE), liuhusi Koordenadór-Jerál MKAE, Sr. Jorge Rui de Carvalho Martins, halo enkontru ho Instituto Nacional de Desenvolvimento de Mão de Obra (INDMO) hodi diskute preparasaun no prioridade Timor-Leste ba Asembleia Jerál WorldSkills Asia, ne’ebé sei hala’o iha loron 18 to’o 20 Novembru 2026, enkontru ne’e hala’o iha sala enkontru MKAE, Palásiu Governu
Soromutu ne’e sai nu’udar oportunidade atu hametin koordenasaun institusionál kona-ba dezenvolvimentu kompeténsia profisionál, akreditasaun no partisipasaun Timor-Leste iha mekanizmu rejionál WorldSkills Asia.
Objetivu prinsipál husi enkontru ne’e mak prepara partisipasaun Timor-Leste ho maneira koordenada, define prioridade institusionál sira, no diskute estrutura, autoridade no sistema akreditasaun ne’ebé presiza atu apoia dezenvolvimentu kompeténsia profisionál iha nasaun.
Koordenadór-Jerál MKAE hateten katak sei konsidera proposta atu forma ekipa ho reprezentante husi 11 Instituisaun Públika (IP) no Entidade Públika (EP), hodi prepara konvokasaun atu diskute asuntu estratéjiku sira.
Asuntu prinsipál sira ne’ebé sei fó atensaun mak ajustamentu estatutu Instituisaun Públika tuir Dekretu-Lei númeru 9 Governu Konstitusionál nian, no preparasaun ba ajénsia nasionál no sistema akreditasaun profisionál.
“Presiza iha padraun ida ne’ebé klaru atu sai guia ba ita hotu, liuliu kona-ba oinsá ajénsia nasionál ida tenke estrutura no iha autoridade ne’ebé apropriada,” dehan Koordenadór-Jerál MKAE.
Diskusaun sei haree mós ba papél no autoridade instituisaun relevante sira, inklui relasaun ajénsia nasionál ho Parlamentu Nasionál, Primeiru-Ministru ka entidade kompetente seluk, no mós oinsá rekonesimentu no akreditasaun bele hala’o tuir lei.
Diretóra INDMO, Sra. Isabel Fernandes de Lima, esplika katak Asembleia Jerál sei hala’o husi 18 to’o 20 Novembru. “Partisipante sira sei selu sira-nia despeza rasik, enkuantu gastu komún sei limitadu ba atividade sira hanesan serimónia boas-vindas no serimónia despedida,” dehan Diretóra INDMO.
Iha Asembleia Jerál, sei diskute mós kandidatura Vanuatu, Síria no Austrália atu sai membru WorldSkills Asia, no preparasaun India ba kompetisaun WorldSkills iha nivel Ázia ne’ebé sei hala’o iha Índia iha tinan oin. Delegasaun sira ne’ebé rejista ona sei hahú to’o iha 17 Novembru, enkuantu kompania sira sei iha oportunidade atu aprezenta sira-nia produtu no inovasaun.
WorldSkills Asia sai plataforma importante ba nasaun membru sira atu fahe esperiénsia, teknolojia no prátika di’ak iha área formasaun téknika no vokasionál, no hametin padraun kompeténsia iha nivel internasionál.
Ba Timor-Leste, partisipasaun iha plataforma ne’e bele loke oportunidade foun ba joven sira atu dezenvolve sira-nia abilidade, asesu ba koñesimentu no teknolojia foun, no prepara-an atu tama iha merkadu traballu ne’ebé sai kompetitivu liután.
MKAE no INDMO konsidera enkontru ne’e nu’udar pasu importante atu prepara Timor-Leste ba partisipasaun ativu iha diskusaun rejionál kona-ba kompeténsia profisionál. Ho preparasaun ne’ebé adekuada, Timor-Leste espera bele kontribui ba dezenvolvimentu sistema kompeténsia profisionál iha rejiaun, hametin parseria, hadi’a sistema akreditasaun no dezenvolve joven sira ne’ebé iha kompeténsia, inovasaun no prontidaun atu hasoru dezafiu iha mundu servisu iha futuru.***
