Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, iha loron 29 Setembru 2026, hala’o vizita traballu ba K-water (Korea Water Resources Corporation) iha Daejeon, Repúblika Korea, nu’udar konvidadu espesiál.
Iha vizita ne’e, Vise-Primeiru-Ministru hala'o enkontru ho Sr. Yun Seogdae, Prezidente no CEO K-water, no partisipa iha Serimónia Asinatura Memorandu Entendimentu (MoU) entre Timor-Leste no K-water. Programa ne’e kontinua ho vizita ba instalasaun K-water, inklui barragem hidroelétrika.
Durante enkontru, Vise-Primeiru-Ministru fó apresiasaun ba oportunidade hodi vizita K-water no simu ho di'ak asinatura MoU ne’e, nu’udar pontu importante ida atu hametin kooperasaun entre Timor-Leste no Repúblika Coreia do Sul.
Vise-Primeiru-Ministru destaka katak, Timor-Leste hein atu aprende husi esperiénsia, koñesimentu no kapasidade téknolojia Repúblika Korea, liuliu iha área jestaun rekursu bee no dezenvolvimentu infraestrutura.
Vise-Primeiru-Ministru mós hato’o esperansa katak kooperasaun ho K-water la’ós de’it sei konsentra iha setór bee, maibé bele dezenvolve no espande ba área interese komún sira seluk.
Nune'e Vise-Primeiru-Ministru simu ho di'ak posibilidade atu uza koñesimentu tékniku no teknolojia Korea nian hodi kontribui ba prioridade dezenvolvimentu Timor-Leste. No subliña katak, MoU ne’e sei sai baze prátika ida atu identifika no dezenvolve área kooperasaun konkreta iha futuru.
Iha vizita traballu Vise-PM nian ne'e hetan akompañamentu husi Embaixadór Timor-Leste ba Coreia do Sul, António de Sá Benevides no ekipa Embaixada Timor-Leste iha Seul.
