DÍLI, 12 Outubru 2026-Gabinete Ministru Koordenadór ba Asuntu Ekonómiku (MKAE), liuhusi Koordenadór-Jerál, Sr. Jorge Rui de Carvalho Martins, realiza konferénsia imprensa iha Sala reuniaun MKAE, Palásiu Governu, hodi esplika pozisaun institusionál kona-ba proposta revizaun saláriu mínimu nasionál iha Timor-Leste.
Iha konferénsia imprensa ne’e, Koordenadór-Jerál esplika prosesu análize no preparasaun esbosu proposta lei atu hasa’e saláriu mínimu nasionál husi US$115 ba US$160 kada fulan. Nia mós klarifika informasaun públika kona-ba alegasaun katak MKAE trava prosesu atu submete proposta ne’e ba Konsellu Ministru (KM).
Iha abertura konferénsia imprensa, Koordenadór-Jerál MKAE hato’o agradese ba jornalista sira, reprezentante órgaun komunikasaun sosiál no sidadaun sira ne’ebé partisipa iha eventu ne’e. Nia aproveita oportunidade ne’e atu hato’o pozisaun institusionál MKAE ho klaridade no transparénsia.MKAE la iha interese atu trava aumentu saláriu mínimu
MKAE enfatiza katak instituisaun ne’e la iha interese atu impede aumentu saláriu mínimu nasionál. Maibé, responsabilidade MKAE mak asegura katak proposta ne’e iha fundamentu tékniku, ekonómiku, sosiál, fiskál no jurídiku ne’ebé forte, atu Governu bele foti desizaun ne’ebé responsável, ekilíbrada no sustentável ba traballadór sira, empregadór sira no ekonomia nasionál.
MKAE konsidera katak revizaun saláriu mínimu mak asuntu importante ne’ebé presiza análize ho kuidadu, konsultasaun ho parseiru sosiál sira no avaliasaun ba impaktu ne’ebé bele mosu, antes Governu foti desizaun finál.
Koordenador Jeral Informa katak, Saláriu mínimu no bem-estar traballadór sira, Governu rekoñese saláriu mínimu nasionál iha papél importante atu apoia moris traballadór sira no sira-nia família, liuliu iha kumprimentu nesesidade bázika hanesan hahán, uma, transporte, edukasaun no saúde.
Saláriu mínimu nasionál ne’ebé aplika agora, US$115 kada fulan, estabelese iha tinan 2012. Ho mudansa iha kondisaun ekonómika no presu sasán iha merkadu, diskusaun kona-ba revizaun saláriu mínimu sai asuntu ne’ebé merese atensaun sériu husi Governu no parseiru sosiál sira.
MKAE mós komprende katak aumentu kustu moris bele hamenus kapasidade traballadór sira atu sustenta sira-nia família. Tanba ne’e, revizaun saláriu mínimu presiza haree ba nesesidade traballadór sira, maibé tenke konsidera mós kapasidade empregadór sira atu implementa medida ne’e ho efetivu.
Tuir esplikasaun MKAE, proposta atu hasa’e saláriu mínimu husi US$115 ba US$160 signifika aumentu US$45 kada fulan, ka aproximadamente 39,1%, neduni presiza análize kle’an.
Montante aumentu ne’e signifikativu, nune’e presiza avaliasaun adisionál atu komprende impaktu reál ba merkadu traballu, kustu operasionál empreza sira, oportunidade empregu no estabilidade ekonomia nasionál.
MKAE subliña katak objetivu atu hadi’a rendimentu traballadór sira tenke la’o hamutuk ho esforsu atu asegura katak medida ne’e bele implementa no sustenta iha tempu naruk. Governu presiza konsidera mós impaktu ba negósiu ki’ik no médiu, ne’ebé bele enfrenta limitasaun iha kapasidade finanseira atu responde ba aumentu kustu traballu.
Tanba ne’e, análize adisionál importante atu ajuda Governu komprende benefísiu no risku potensiál husi proposta ne’e, inklui impaktu ba rendimentu família, produtividade, empregu no sustentabilidade negósiu.
MKAE reafirma katak preparasaun proposta lei kona-ba saláriu mínimu nasionál tenke bazeia ba dadus no evidénsia ne’ebé bele sustenta desizaun Governu. Objetivu la’ós de’it atu determina montante saláriu ne’ebé atu aumenta, maibé mós atu asegura katak desizaun ne’e fó benefísiu ba traballadór sira, sem kria presaun ekonómika ne’ebé la sustentável ba empregadór sira no merkadu traballu.
Ho pozisaun ne’e, MKAE hakarak klarifika katak prosesu análize no preparasaun proposta ne’e tenke komprende nu’udar parte husi responsabilidade institusionál atu apoia prosesu foti desizaun Governu ho baze téknika no evidénsia.
Iha kontestu ida-ne’e, revizaun saláriu mínimu nasionál kontinua sai asuntu importante ba diálogu entre Governu, traballadór sira, empregadór sira no parseiru sosiál sira, ho objetivu atu buka solusaun ne’ebé konsidera nesesidade traballadór sira no kondisaun ekonómika Timor-Leste. ***
