Dili, 17 Juñu 2026
Gabinete Ministériu Koordenadór ba Asuntu Ekonómiku (MKAE), ne’ebé lidera husi Koordenador Jeral, Sr. Jorge Rui de Carvalho Martins, Lidera reuniaun estratéjiku ho Banku Mundial liu husi International Finance Corporation (IFC), atu diskute konsensu nafatin katak Portu Antigu sei tranzita nia funsaun ba Sentru Kruzeiru Internasionál (ICC), aliñadu ho prioridade dezenvolvimentu turizmu marítimu Timor-Leste nian, koordenasaun institusionál, no reforma ambiente investimentu. Iha tempu hanesan, reuniaun ne’e mós esplora potensiál turístiku iha Baía Tibar. Enkontru ne’e hala’o iha Sala Enkontru Gabinete MKAE, Palásiu Governu, Kinta-Feira.
Atu rezolve ambiguidade operasionál sira ne’ebé eziste, espesialista marítima IFC nian subliña importánsia esbosu Prosedimentu Operasionál Padraun (SOP) klaru, liu-liu kona-ba alokasaun ró nian. Atu garante aproveitamentu efetivu husi marketing globál no atu estende tempu estadia pasajeiru kruzeiru sira nian, espesialista dezenvolvimentu merkadu IFC nian destaka nesesidade urjente atu estabelese ekosistema públiku-privadu ida koordenadu di’ak — inklui matadalan turístiku, transporte, no lojístika — atu garante integrasaun di’ak ba pasajeiru sira to’o no to’o sira sai ba rai.
Konsultasaun ne’e mós foka liu ba valor minimu investimentu hanesan rekomenda husi Diagnóstiku Setór Privadu Nasaun (CPSD). IFC sujere atu konsidera valor minimu investimentu ne’ebé ki’ik liu, atu nune’e bele fasilita no enkoraja dezenvolvimentu mikro-turizmu.
Husi parte governu nian, Koordenador Jeral MKAE fahe preokupasaun públiku kona-ba impaktu mikro-negósiu estranjeiru sira nian ba emprezáriu lokál sira, no hatudu pozisaun katak hasa’e valor minimu investimentu sai aas liu bele kontribui ba protesaun di’ak liután ba komérsiu doméstiku.
Hodi harii estratéjia ida ne’ebé ekilibradu no bazeia ba evidénsia, IFC konkorda atu hala’o estudu komparativu kona-ba esperiénsia merkadu internasionál sira seluk, atu informa desizaun polítika tuirmai. Estudu ne’e sei analiza hamutuk ho progresu realizasaun Portu Tibar foun, molok aprezenta rezultadu sira iha fulan Setembru 2026.
Partisipa iha reuniaun ne’e Koordenador Strategic Unit for Economic Integration (SUEI), Sr. Leonito Soares, no Assessór Ekonómiku, Sr. Michael Laurensius.
