Díli, 24 Juñu 2026

Ministru Koordenadór ba Asuntus Ekonomiku liu husi Gabinete Koordenadór Jerál Sr. Jorge Martins lidera komisaun téknika interminestérial hodi rakompaña aprezentasaun ba proposta investimentu hosi empreza Manatuto Renewables Power S.A., Sufnentimo Nafael Unipessoal, Lda., no Green PZZ, Lda., ne’ebé submete ona liu hosi pedidu ba Sertifikadu Deklarasaun Benefisiu (DB).

Objetivu hosi sorumutu ne’e maka, atu komisaun téknika bele halo avaliasaun klean ba proposta investimentu no planu negósiu ne’ebé subemete hosi empreza sira, nune’e bele asegura katak, planu investimentu refere bele kumprementa ba rekezitu tékniku no iha valór ekonómiku tuir lei investimentu privadu nú. 15/2017 no regulamentu relevante sira seluk.

Empreza Manatuto Renewables Power S.A., nu’udar empreza konsórsiu EDF Power Solutions International S.A.S (50.99%), EDF Power Solutions Development, SAS (0.01% ) no I-Enviroment Investments Pacific PTY Lda (49.00%), ho valor investimentu USD $ 100,000,000,00-107,100,000.00. Empreza ida ne’e sei estabelese plataforma indústria 72 MW Enerjia Renovavel Photovoltaic no 36 MWH/Horas sistema armazenamentu enerjia iha bateria (BESS) ne’ebé lokaliza iha Aldeia Uma Rentau, Suku Lifau, Postu Adminstrativu Laleia.

Koordenadór Jerál MKAE, hateten, ida ne’e oportunidade bo’ot ida ba dezenvolvimentu ekonómiku Timor-Leste nian, la signifika katak ita iha ne’e la aseita, maibé ita iha ne’e atu hare prosesu oinsá bele aliña ho estratéjia dezenvolvimentu governu nian ba diversifikasaun ekonómiku. Ita-bo’ot sira reprezenta Ministériu no setór importante sira nia desizaun, Trade Invest no MKAE fasilita de’it prosesu sira hanesan ne’e ita tenki kria liñas Ministeriais hotu hodi haree ita nia dirijénsia tomak saida mak bele no saida mak labele, tau iha ita nia pensamentu katak la’os despaixu hotu-hotu ita tenki no despaixu hotu ita labele kumpri, maibé fó kbi’it tomak mai ita hanesan dirijente atu analiza no fó alterasaun no solusaun ba ita nia superior sira hodi toma desizaun ne’ebé mak labele viola lei ne’ebé mak iha.

Konserteza iha rejime ida iha aspektu tolu mak importante hanesan, lei, regulamentu no ida bo’ot liu mak polítika governativas, tamba ida ne’e mak ita iha Konsellu Ministru ita iha dirijente, estrutura sira no governu atu haree ho dirijénsia, amenda no fó solusaun alternativus ne’ebé mak diak ba aspeitu dezenvolvimentu ekonímiku ba ita nia rain.

Koordenadór Jerál mós hameno katak, ita labele sai fali fatin ou dalan atu iha komprimisu oi-oin ba saida deit mak ita sente katak la tuir dunik setór nia regras, setór nia regulamentu no setór nia analiza dirijénsia, ita-bo’ot sira nia independénsia no ita-bo’ot sira nia dirijénsia mak ita presija iha ne’e, atu nune’e Sua Exelênsia Vise Primeiru-Ministru nu’udar Ministru Koordenadór ba Asuntu Ekonómiku aprezenta iha Konsellu Ministru kona-bá assuntu ruma hanesan ne’e bele foti desizaun ida ne’ebé mak sertu no tuir dunik dalan pareser ne’ebé mak ita-bo’ot sira halo, TradeInvest no MKAE kompilla deit ita bo’ot sira nia opinioens, tékniku, polítiku no jurídiku hodi foti desizaun ba solusaun.

Hafoin rona no halo analiza ba substánsia hosi aprezentasaun hirak ne’e, komisaun tékniku sei halo konfirmasaun ba informasaun sira ne’ebé empreza aprezenta, fo opiniaun teknika, sujestaun konstrutivu sira, ne’ebé relevante atu empreza bele tau iha konsiderasaun hodi garante katak prosesu sira ba investimentu nian bele la’o tuir lei no regulamentu sira no bele kontribui signifikativu ba dezenvolvimentu ekonómia rai-laran.

Sorumutu ne’e hetan akompañamentu husi Adjuntu Diretór Ezekutivu, TradeInvest Timor-Leste,Sr. Roberto Lai no Diretór Investimentu Sr. Ezaquel Babo.