Dili, 24-09-2026

Ministru Koordenadór Asuntu Ekonómiku (MKAE), liuhosi Koordenadór Jerál, Sr. Jorge Rui de Carvalho Martins, realiza enkontru ho ekipa tékniku Laboratóriu Ministériu Obras Públikas (MOP), hodi hala’o diskusaun téknika kona-ba infraestrutura ICC iha Portu Dili. Enkontru ne’e hala’o iha Sala Enkontru Laboratóriu MOP, Kolmera, Dili.

Ojetivu husi enkontru ne’e atu diskuti no haree servisu sira ne’ebé foka liuliu ba infraestrutura ICC iha Portu Dili, no mós atu troka informasaun ba avaliasaun aspetu tékniku nian, no diskute kona-ba kondisaun no nesesidade infraestrutura ICC iha área Portu Dili.

Koordenadór Jerál hateten katak: “Ita presiza instrumentu ruma ne’ebé bele kompleta tan testu sira ne’e. Bele koalia ho sira atu sira bele buka meius durante projetu ne’e la’o.”

Iha diskusaun ne’e, Koordenadór Jerál MKAE, hamutuk ho ekipa tékniku Laboratóriu MOP, troka hanoin no informasaun téknika relevante sira, ho objetivu atu asegura komprensaun komún kona-ba aspetu infraestrutura ne’ebé presiza atensaun no akompañamentu tékniku.

Enkontru ne’e mós sai nu’udar espasu estratéjiku atu haforsa koordenasaun no kolaborasaun interinstitusionál entre MKAE no MOP, liuliu iha área planeamentu, avaliasaun no dezenvolvimentu infraestrutura ne’ebé iha relasaun ho Portu Dili.

Liuhosi koordenasaun no enkontru tékniku ne’e, sei asegura kontinuidade servisu nian. Parte sira buka atu promove abordajen ne’ebé koordenadu no bazeia ba konsiderasaun téknika, hodi suporta prosesu dezenvolvimentu infraestrutura ICC no kontribui ba hadi’a efisiénsia no sustentabilidade infraestrutura iha Portu Dili.