Tibar, 05/06/2026
Ministru Koordenador ba Asuntu Ekonómiku (MKAE), liuhusi Koordenadór Jerál, Sr. Jorge Rui Martins de Carvalho, ne’ebé reprezenta Sua Exelénsia Ministru, hala’o enkontru mensal ho entidade tutela sira iha ámbitu MKAE, iha Salaun Sentru Bambu, Tibar.
Objetivu husi enkontru ne’e mak atu avalia Dezempeñu Institusionál no Dezempeñu Pesoál husi kada instituisaun, hodi buka solusaun ba dezafiu tékniku sira ne’ebé infrenta daudaun.
Iha sorumutu ne’e, Koordenadór Jerál subliña pontu prioritáriu no solusaun importante tolu;
Rezoluasaun Imidiata ba Kestaun Tékniku sira: Koordenadór Jerál fó koñesimentu no subliña mós katak, enkontru trimensal sira liubá labele sai de’it fatin ba lamentasaun, maibé tenke transforma ba fali fatin desizaun nian. Tan ne’e, husu ba dirijente hotu-hotu atu foti asaun efisiente ho koñesimentu tékniku ne’ebé aas, hodi nune’e bele hatán lalais no fó solusaun ne’ebé bazeia ba faktu ba kestaun pendente hotu ne’ebé dezafia daudaun dezempeñu institusionál.
Kultura Lideransa Lójika no Garantia Disiplina: Reafirma ho pozisaun ofisiál katak Vise-Primeiru-Ministru no Ministru MKAE la aseita prátika koersiva ka uza instrumentu kontratu servisu nian hodi fó presaun sikolójika ba subordinadu sira, liuliu hodi prejudika sira-nia direitu atu hato’o opiniaun ka krítika konstruktivu. Sura mós katak, knaar dirijente nian mak lidera ho matenek, nune’e mós tenke hamriik metin hodi foti desizaun bazeia ba regulamentu internu hodi foti fali medidas disiplinár hasoru asaun indisiplinadu ka iregulár hotu ne’ebé mosu iha instituisaun laran.
Autonomia Estruturál no Koordenasaun Sólida: Esclarese ho klaru katak solusaun ba dezafiu operasionál sira tenke mai duni husi proatividade dirijente kada Institutu Públiku (IP), bazeia ba kompeténsia ne’ebé Dekretu-Lei fó ba Ministru Tutela, no labele hein de’it desizaun foti-an husi Koordenadór Jerál. Knaar Koordenadór Jerál nian mak atu fasilita, hametin sistema koordenasaun, no tau matan ba servisu tékniku hodi tulun Sua Exelénsia Ministru foti desizaun ne’ebé fundamentadu no adekuadu.
Iha enkontru ne’e, marka prezensa mós husi Lideransa Institutu Públiku (IP) no Empreza Públika (EP) sira ne’ebé tutela iha MKAE; AIFAESA, I.P. – Autoridade Inspesaun no Fiskalizasaun Atividade Ekonómika, Sanitária no Alimentár. SERVE, I.P. – Servisu Rejistu no Verifikasaun Emprezariál. IADE, I.P. – Institutu Apoiu ba Dezenvolvimentu Emprezariál. TradeInvest Timor-Leste, I.P. – Ajénsia Promosaun ba Investimentu no Esportasaun Timor-Leste. IQTL, I.P. – Institutu ba Kualidade Timor-Leste. INDMO, I.P. – Institutu Nasionál Dezenvolvimentu de Mão-de-Obra. Institutu Bambu, I.P. – Institutu Peskiza, Dezenvolvimentu, Formasaun no Promosaun Bambu. CLN – Sentru Lojístiku Nasionál. IGT – Inspesaun-Jerál Traballu. CCD – Sentru Konvensoins Dili. CNEFPE – Sentru Nasionál Formasaun Profisionál no Empregu. CNFP-Bekora – Sentru Nasionál Formasaun Profisionál Bekora.
