DÍLI, 21 MAIU 2026
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Sr. Francisco Kalbuadi Lay, hamutuk ho membru Governu no entidade relevante sira, marka prezensa iha Parlamentu Nasionál hodi responde ba konvite audiensia husi Komisaun D ne’ebé trata Asuntu Ekonomia no Dezenvolvimentu. Serimónia ne’ebé hala’o iha Sala Plenária PN.
Objetivu husi audisaun ne’e atu aprofunda análize no fó klarifikasaun kona-bá “Proposta Lei n.º 31/VI (3ª) – Primeira Alterasaun Lei n.º 8/2025, de 27 de Novembro, Orsamentu Jerál Estadu (OJE) ba tinan 2026”.
Vise-PM Francisco Kalbuadi Lay, Governu hato’o katak Proposta Primeira Alterasaun ba Lei OJE 2026 ne’e iha objetivu prinsipál hodi ajusta alokasaun orsamentál ho nesesidade atuál dezenvolvimentu nasaun nian.
“Governu konsidera katak iha programa no projetu prioritáriu sira ne’ebé presiza reforsu finanseiru lalais, liuliu hodi aselera dezenvolvimentu infraestrutura, investimentu públiku, no hodi hametin kbiit kreximentu ekonomia nasionál”. Hateten Vise-PM
Komisaun D Parlementu Nasionál hato’o kestaun sira hodi husu klarifikasaun no informasaun detalladu kona-bá nesesidade alterasaun, prioridade programa Governu sira, no impaktu ekonómiku no sosiál husi proposta refere.
Audisaun ne’e konsidera nu’udar instrumentu vitál ida hodi asegura katak jestaun no utilizasaun osan Estadu nian la’o ho transparénsia, responsabilidade ne’ebé aas, no lori benefísiu loloos ba interese povu no dezenvolvimentu país nian.
Tuir prosedimentu legál no regra jestaun finansa públika nian, alterasaun ba Lei OJE bele akontese bainhira Governu identifika katak iha nesesidade foun ka prioridade urjente ne’ebé presiza duni ajustamentu orsamentál durante implementasaun tinan fiskál.
Bazeia mós ba Lei Enkuadramentu Orsamentál no regra finansa Estadu nian, mudansa boot ruma iha estrutura ka alokasaun OJE labele deside de’it husi ezekutivu, maibé tenke hetan aprovasaun fórnal husi Parlamentu Nasionál hafoin liuhusi prosesu audisaun, diskusaun, no deliberasaun parlamentár.
Iha audiensia ne’e, Vise-Primeiru-Ministru Francisco Kalbuadi Lay hetan akompañamentu husi Koordenadór Jerál MKAE, Sr. Jorge Rui de Carvalho Martins. partisipasaun husi Ministra Finansa, Santina José Rodrigues F. Viegas Cardoso, no Ministru Petróleu no Rekursu Minerais, Francisco da Costa Monteiro no entidade relevante sira seluk.
