Filipina 4- Maiu-2026
Gabinete Ministru Koordenadór ba Asuntus Ekonomiku, (MKAE) liu hosi Koordenadór SUEI, Leonito Soares de Jesus ne’ebé Reprezentante Governu Timor-Leste, hodi partisipa ba da-huluk iha Konferénsia Anuál International Competition Network (ICN) Tinan 2026, ne’ebé halao iha Philipine, durante loron haat (4), husi loron 5 to 8 Maiu 2026.
Eventu ne’ebé ho nivel mundiál ne’e halibur hamutuk autoridade kompetisaun, formuladór polítika, no espertu sira husi mundu tomak hodi diskute prátika di’ak liu, haforsa kooperasaun, no promove merkadu ne’ebé justu no kompetitivu ba dezenvolvimentu ekonómiku ne’ebé sustentável.
Partisipasaun Timor-Leste nian iha fórum globál ne’e refleta kompromisu maka’as Estadu nian hodi hametin governasaun ekonómika no harii ambiente negósiu ne’ebé transparente, ekuitativu, no kompetitivu. Hafoin aprovasaun foin lalais ba Lei Kompetisaun Timor-Leste, ho apoiu husi United Nations Conference on Trade and Development (UNCTAD), konferénsia ne’e sai hanesan oportunidade valiozu ida hodi aprende husi esperiénsia internasionál no haforsa ligasaun ho parseiru globál no rejionál sira.
Iha biban ne’e, Koordenador SUEI Reprezentante MKAE. Governu hala’o mós enkontru bilaterál no diskusaun ho Prezidente, Komisionáriu, ofisiál senior, no delegasaun sira husi nasaun oioin, liuliu husi Australia, Nova Zelándia, Filipinas, Portugál, Guatemala, Gâmbia, Aruba, Fiji, no Bangladés. Alende ne’e, hala’o mós simeira ho Profesór ba Kompetisaun Globál no Diretur Polítika husi Competition Law Center.
“Nu’udar onra boot ida hodi reprezenta Timor-Leste ba dala uluk iha, International Competition Network. (ICN) mak rede globál ida ne’ebé foka ba aplikasaun lei kompetisaun nian iha mundu tomak. Ha’u haksolok hodi fahe progresu kona-ba aprovasaun Lei Kompetisaun no preparasaun ba estabelesimentu Autoridade Kompetisaun nasionál. Ami simu reasaun pozitivu tebes husi parseiru sira ne’ebé fó bemvindu ba pasu importante ne’e no prontu atu apoiu Timor-Leste iha implementasaun lei no harii instituisaun ne’e,” hateten Koordenador SUEI Reprezentante MKAE.
Nu’udar membru foun ba ASEAN no OMK (WTO), Timor-Leste kontinua dudu ninia integrasaun ba ekonomia rejionál no globál. Partisipasaun ne’e kontribui mós hodi hato’o aspirasaun, dezafiu, no oportunidade sira ne’ebé Timor-Leste enfrenta, hodi harii parseria ne’ebé bele apoiu dezenvolvimentu ekonómiku inkluzivu no sustentável ba povu Timor-Leste.
