DÍLI, 31 MARSU 2026
Gabinete Vise-Primeiru Ministru (V-PM) no Ministru Koordenadór ba Asuntu Ekonómiku (MKAE), ne’ebé organiza liuhusi Koordenadór Jerál, Jorge Rui de Carvalho Martins, realiza enkontru rutina ba fulan dala-toluk (3) hamutuk ho Instituisaun Públiku (IP) no Empreza Públika (EP), sira ne’ebé tutela iha MKAE. Sorumutu ne’e hala’o iha Sala Enkontru AIFAESA, Matadouru, Dili, Timor-Leste.
Objetivu prinsipál husi enkontru Rutina ne’e atu avalia ba progresu servisu no buka solusaun no dezafiu sira ne’ebé instituisaun sira enfrenta.
Iha sorumutu ne’e, Koordenadór Jerál MKAE, Jorge Rui de Carvalho Martins, fó hanoin fali kona-ba implementasaun rejime foun ba funsionáriu kontratatu sira.
“Ita tama ona iha loron 3 Fevereiru 2026, iha rejime jurídiku ba kontratu traballu termu sertu sira. Ha’u espera katak superior sira hotu bele rezolve asuntu internu ba funsionáriu kontratatu sira iha ida-idak nia instituisaun,” dehan Jorge Martins.
Koordenadór Jerál MKAE mós hatutan katak, maske Funsaun Públika no Ministériu Finansas fó responsabilidade ne’ebé boot, nia fiar katak lideransa husi instituisaun ida-idak iha ona solusaun ka prosesu propriu hodi responde ba dezafiu sira-ne’e.
Iha fatin hanesan Inspetora Jerál AIFAESA, Dra. Odete da Silva Viegas, mós relata progresu servisu nian, liuliu kona-ba servisu inspesaun, fiskalizasaun, no reseita husi koimas. Kona-ba dezenvolvimentu infraestrutura, Dra. Odete informa katak laboratóriu AIFAESA nian daudaun ne’e tama ona iha faze tenderizasaun liuhusi Komisaun Nasionál Aprovisionamentu (CNA).
Inspetora Jerál hato’o mós dezafiu operasionál sira, liuliu kona-ba folin kombustível sa’e, ne’ebé fó impaktu diretu ba mobilidade servisu inspesaun nian iha terenu.
Enkontru ne’e sai hanesan plataforma estratéjiku ba instituisaun tuteladu sira hotu hodi halo auto-avaliasaun ba dezempeñu servisu nian durante trimestre dahuluk tinan 2026. Diskusaun ne’e foka liu ba oinsá optimiza servisu públiku maske hasoru limitasaun oioin.
Sorumutu nivel altu ne’e konta ho partisipasaun másimu husi lideransa sira husi, Inspesaun-Jerál ba Trabalhu (IGT). Sentru Lojístika Nasionál (CLN). Institutu ba Kualidade Timor-Leste (IQTL). Institutu Nasional ba Dezenvolvimentu de Mão-de-Obra (INDMO). Sentru Nasional Formasaun Profissional (CNFP Tibar no Becora). Institutu ba Apoiu no Dezenvolvimentu Empresarial (IADE). Servisu Rejistu no Verifikasaun Emprezariál (SERVE, I.P.), TradeInvest. no Sentru Bamboo.
Media MCAE
