Dili, 11 Marsu 2026 –
Gabinete Vice-Primeiru Ministru no Ministru Koordenadór ba Asuntu Ekonómiku (MKAE), liu-husi Koordenadór Jerál Interinu Alves Gomes Martins, simu vizita kortezia husi Delegasaun Ekonómika no Komérsiu Hong Kong (HKETO) iha Palásiu Governu, Dili. Enkontru ne’e diskute oportunidade kooperasaun iha área transformasaun ekonomia dijitál no finansa teknolojia (fintech) hodi suporta dezenvolvimentu ekonomia Timor-Leste.
Koordenadór Jerál Interinu MKAE hateten katak Timor-Leste la’ós de’it hakarak sosa teknolojia, maibé hakarak sai parte husi ekonomia dijitál global. Parte rua konkorda hodi kontinua esplora kooperasaun liuhusi estudu komparativu no troka esperiénsia, inklui possibilidade haruka ofisiál Timor-oan ba Hong Kong hodi aprende kona-ba infraestrutura dijitál, blockchain(sistema ida iha ne’ebé rejistu kona-ba tranzasaun sira, liuliu sira ne’ebé halo iha kriptomoeda, mantein liuhosi komputadór), sistema pagamentu dijitál no seguransa siber.
Iha enkontru ne’e, Diretora-Jerál HKETO Libera Cheng mos aprezenta sistema “Single Window” dijitál hodi fasilita komérsiu internasionál liuhusi plataforma online ida de’it, hodi hamenus burokrasia no kustu operasional. Nia mos destaka katak Hong Kong bele ajuda Timor-Leste asesu ba finansiamentu iha moeda oioin hanesan RMB, HKD no USD, hodi diversifika opsaun finanseira no suporta modernizasaun ekonomia Timor-Leste inklui preparasaun hodi integra iha ASEAN.
