Díli, Timor-Leste – Gabinete Ministru Koordenadora Assuntu Ekonomiku (MKAE) realiza Reuniaun Mensál Superior Instituisaun Públika (IP) no Empreza Públika (EP) iha loron 27 Fevereiru 2026 iha edifísiu INDMO, I.P., Fatuhada, Díli.
Reuniaun ne’e envolve ofisiál sira nivel superior husi Instituisaun Públika no Empreza Públika hotu-hotu ne’ebé tama iha tutela MKAE, ho objetivu atu hametin koordenasaun institusionál, asegura aliñamentu estratéjiku, aumenta efisiénsia orsamentál, no promove transparénsia no boa governasaun iha setór ekonomiku.
Iha nia intervensaun, Koordenadór Jerál MKAE, Jorge Rui de Carvalho Martins, hateten katak reuniaun ida-ne’e tenke kontinua sai fatin ba proposta no rekomendasaun sira, no liu-liu sai fatin ba buka solusaun konkretu ba dezafiu sira ne’ebé kada Instituisaun Públika no Empreza Públika hasoru.

Reuniaun ne’e mós fó oportunidade atu avalia dezempeñu institusionál, identifika dezafiu prinsipal sira, hametin sinerjia inter-institusionál no estabelese medida konkretu sira atu hadi’a servisu públiku ba povu.
Ho mekanizmu koordenasaun mensál ida-ne’e, MKAE reafirma nia kompromisu atu hametin koerénsia iha implementasaun polítika sira, hadi’a dezempeñu instituisaun sira, no asegura katak rekursu públiku jere ho di’ak atu suporta prioridade dezenvolvimentu ekonomiku nasional.