Díli, 06 Fevereiru 2026 –
Gabinete Ministru Koordenadór Asuntu Ekonomiku (MKAE), ne’ebé reprezenta husi Xefe Unidade Administrasaun no Finansas (UAF), Natalia Nascimento da Cruz Fatima, partisipa iha serimónia abertura formasaun profisionál tinan 2026 iha CNFP Becora. Formasaun sira ne’e inklui área Konstrusaun Sivil (Sertifikadu Nível I–III), Servisu Restorante no Housekeeping.
Iha liafuan abertura, Xefe Unidade Administrasaun no Finansas hateten katak ekonomia forte hahú husi rekursu umanu ne’ebé iha kualifikasaun, no formasaun profisionál importante la’ós de’it hodi hetan sertifikadu, maibé hodi prepara foin-sa’e sira atu kontribui ba dezenvolvimentu ekonomiku Timor-Leste nian.
Diretora Ezekutiva CNFP Becora, Bernadete Pinto Miranda Gomes, informa katak iha tinan 2026 rejistu kandidatu 752, no hili ona ema 443 hodi tuir formasaun, inklui foin-sa’e sira, membru F-FDTL, reprezentante relijiozu no funsionáriu públiku. Nia mos husu ba partisipante sira atu mantein disiplina no dedikasaun durante prosesu formasaun.
Diretór Jerál SEFOPE, Carlito Rosário Cabral, reafirma kompromisu Governu nian atu kontinua fó apoiu ba parcería ho sentru formasaun, no apresia kontribuisaun CNFP Becora iha promosaun empregabilidade no alinamentu formasaun ho nesesidade merkadu traballu nasionál no internasionál.
Serimónia ne’e mostra kontinuidade Governu no parseiru sira hodi fortalesa kapasidade forsa traballu no sustenta dezenvolvimentu ekonomiku inkluzivu iha Timor-Leste.
