Díli, 22 Janeiru 2026
Vise-Primeiru Ministru no Ministru Koordenadór Assuntu Ekonomiku, ho mos Ministru Turizmu no Ambiente, Francisco Kalbuadi Lay, iha loron Kinta semana kotuk liu, lansa fatu dahuluk ba konstrusaun Sentru Inkubasaun Negósiu, iha Matadoru, Vila Verde, Vera Cruz, Díli.
Sentru Inkubasaun Negósiu nee iha objetivu atu apoia negósiu foun sira, hodi hamenus risku iha faze hahú, no transforma ideia di’ak sira sai negósiu susesu no sustentavel.
Iha diskursu, Vise-Primeiru Ministru hatete katak sentru nee reflete visaun klaru Timor-Leste nian atu harii ekonomia diversifikadu no sustentavel, hamenus dependénsia ba mina no gás, kria servisu no haforsa mikro, pequena no média enpreza (MPME). Apoiu espesial sei fó ba feto sira, jovem sira no enprezáriu rurál sira, inklui orientasaun, formasaun no asesu ba finansas.
“Sentru ida nee la’ós deit edifísiu ida, maibé fundasaun ba oportunidade, empregu no kresimentu ekonomiku,” hatete nia.
Projetu konstrusaun nee iha valor US$ 3,155,389.40, tuir kontratu Tender/009/MCI-2025, asina iha 13 Dezembru 2025, ho durasaun 365 loron.
Serimónia lansa fatu dahuluk nee hetan partisipa husi membru Governu, enprezáriu, autoridade lokál no konvidadu sira
