Dili, Loron, Segunda, 29 Dezembru 2025
Koordenadór Jerál Gabinete, Ministru Koordenadór ba Asuntu Ekonómiku (MKAE), Jorge Rui de Carvalho Martins, partisipa avaliasaun dezempeñu avalia no projeta ba reforsa papél sentral Sentru Lojístika Nasionál (CLN), nu’udar garantia estabilidade no sustentabilidade Lojístika Nasionál
“Ha’u hakarak toka iha ne’e, asuntu importánsia husi avaliasaun dezempeñu institusionál no saida mak nia signifika lolós. Avaliasaun la’os deit ba Sentru Lojístika Nasionál nu’udar instituisaun públika estratéjika, maibé mós ba ita ida-idak nu’udar profesionál ne’ebé hetan fiar atu jere responsabilidade bo’ot ba nasaun ida ne’e,” hatete Koordenador Jeral.
Avaliasaun dezempeñu institusionál la’os deit ezersísiu formal ida ba obrigasaun administrativa, ida ne’e mak instrumentu estratéjiku ne’ebé permite atu sukat oinsá bele kumpri nia mandatu, jere rekúrsu públiku ho sufisiente no fornese servisu lojístiku ne’ebé viavel, integradu no ho kualidade ba estadu setór privadu no importante liu ba komunidade.
“Ha’u fiar Natál mós hamoris mai ita espíritu foun ida, katak, atu sai profesionál la’os deit hare’e ba tur iha pozisaun ho kadeira no lideransa, maibe saida mak ita halo ona durante governu fó fiar mai ita, tinan ida tomak hahu husi 1 Janeiru 2025 to’o 31 Dezembru 2025, dedikasaun no kompaixaun mak grandeza bo’ot tebes, liu fali pozisaun iha estrutura ita nia moris nian,” sublina Koordenador Jeral.
Sentru Lojístika Nasionál ne’ebé signifikadu partikular tebes, nu’udar instituisaun ida ne’ebé responsavel atu hametin sistema lojístika nasionál, Sistema lojístika ida ne’ebé diak no modernu sei harii konfiansa husi setór produtivu sira, importadór no exportadór sira, no-mós husi povu Timor-Leste rasik.
Objetivu prinsipal husi avaliasaun dezempeñu, espera hotu-hotu bele hanoin hetan dezempeñu institusionál mak atu hametin liu-tán efikásia institusionál hasa’e responsabilizasaun no transaparénsia no hadia kualidade prestasaun servisu lojístika nian.
“Mai ita haree prosesu avaliasaun dezempeñu ida ne’e hanesan oportunidade ida, la’os deit atu kumpri padraun maibé atu hametin Sentru Lojístika Nasionál, hasa’e kredibilidade intitusionál CLN nian, no apoiu transformasaun ekonómiku nasionál. Hamutuk ita bele asegura katak Sentru Lojístika Nasionál kontinua atu sai pilár ida bá efisiénsia lojístika, estabilidade ekonómika no dezenvolvimentu sustentável Timor-Leste nian,” hatete Koordenador Jeral. ***
