Gabinete Ministru Koordenadór Asuntu Ekonómiku (MKAE), liuhosi nia Koordenadór Jerál, Jorge Rui de Carvalho Martins, fahe Sertifikadu Profisionál ba graduadu hamutuk 231 ne’ebé remata ho susesu formasaun profisionál iha CNFP Becora iha loron 16 desembru 2025.

Iha ninia observasaun, Koordenadór Jerál subliña katak sertifikasaun formasaun profisionál esensiál atu dezenvolve forsa traballu kualifikadu ne’ebé kompetitivu, adaptavel, no prontu atu kontribui ba dezenvolvimentu nasionál, no mós atu responde ba ezijénsia merkadu traballu rejionál no globál. Iha era ida ne’ebé iha konetividade globál, abilidade sira la’ós ona opsionál maibé nesesidade fundamentál ida.
Ba Timor-Leste, formasaun profisionál no sertifikasaun hala’o knaar vitál hodi apoia diversifikasaun ekonómika, kriasaun empregu, no integrasaun iha merkadu rejionál no globál. Forsa traballu ne’ebé kualifikadu no sertifikadu hasa’e kredibilidade nasaun nian, hametin konfiansa investidór nian, no koloka Timor-Leste nu’udar fonte konfiável ba traballadór kualifikadu iha rejiaun ASEAN nia laran.

Koordenadór Jerál mós rekoñese dezafiu kontínuu ne’ebé sentru formasaun sira hasoru, inklui limitasaun iha infraestrutura, ekipamentu, finansiamentu, no asesu ba teknolojia. Maski iha limitasaun sira-ne’e, progresu signifikativu kontinua halo liuhosi espansaun programa, hadi’a kualidade formasaun, no aumentu partisipasaun hosi joven sira, tantu feto no mane.

Graduadu na’in 231 ne’e kompleta formasaun iha área oioin, inklui konstrusaun sivíl, alvenaria no karpintaria, kanalizasaun, soldadura, instalasaun elétrika, no setór sira la’ós konstrusaun nian hanesan kostura, teknolojia informasaun, pasta, manutensaun ar-kondisionadu, administrasaun jerál, no mekániku motorizadu.
“Ami sente orgullu ho konkista husi graduadu sira.Sertifikadu ida ne’e la’ós rohan, maibé inísiu viajen foun ida ba futuru ne’ebé nabilan liu—ba ita-boot sira, ita-boot sira-nia família, no ba nasaun.Ita-boot sira mak fundasaun ba futuru forsa traballu Timor-Leste nian,” tenik Koordenadór Jerál ne’e.

MKAE mós hato’o ninia apresiasaun sinseru ba formadór, instrutór, no fornesedór formasaun sira ba sira-nia dedikasaun no kontribuisaun valiozu hodi harii abilidade, konfiansa, no karakter graduadu sira-nian.

Media MKAE