Gabinete Ministru Koordenadór ba Asuntu Ekonómiku (MKAE), liu husi Koordenador Jerál, Jorge Rui de Carvalho Martins, halo vizita traballu ba Munisipiu Vikeke, Postu Administrativu Vikeke Vila, iha Suku Beaco, hodi realiza serimonia inaugura Moru foun ba Sentru Formasaun Profisionál Beaço.

“Ohin, tempu ida orgullu tebes mai ha’u no haksolok bo’ot bele mai hamutuk ho ita bo’ot sira hotu, lori Sua Exélensia Vise-Primeiru-Ministru (V-PM), Ministru Koordenadór ba Asuntu Ekonómiku (MKAE), no Ministru Turizmu Ambiente (MTA), atu mai inaugura Moru foun ba Sentru Formasaun Profisionál, Beaço nian,” hatete Koordenador Jerál liu husi ninia intervesaun.

Koordenadór Jerál reforsa tan katak, momentu serimonia ida-ne’e MKAE apresia imi hotu nia servisu maka’as, husi ema ida-idak inklui kompañia rua ne’ebé hola parte ba projetu ida-ne’e sai realidade. Husi planeamentu to’o konstrusaun, nee hatudu imi nia dedikasaun no perseveransa sai evidensia iha kada tijolu, kada didin, no kada detalla husi instalasaun moru ida-ne’e.

“Ha’u nia apresiasaun espesiál ba Diretora CNFP Bekora, ho ninia estrutura tomak liu-liu formadór no profesores estudante sira-nia estrutura formasaun Beaço ba imi nia supervizaun no orientasaun tékniku ne’ebé konsistente, hodi garante katak projetu ne’e kumpri padraun kualidade no seguransa ne’ebé aas liu. Ita-boot sira nia profisionalizmu no sentidu misaun nian hatudu duni espíritu ne’ebé dudu edukasaun vokasionál nafatin la’o ba oin,” dehan Koordenadór Jerál.

Parabéns dala ida tan ba realizasaun notável ida-ne’e, no hanesan sinál esperansa nian Espera katak instalasaun foun ida-ne’e sai hanesan lembransa ida ne’ebé dura kona-bá saida mak bele realiza hamutuk ba jerasaun sira tuirmai.

Média MKAE