Sua Exelensia Vise-Primeiru-Ministru Koordenador Asuntu Ekonomiku, Ministru Turizmu no Ambiente, Dato Seri Francisco Kalbuadi Lay, partisipa iha Konferensia Komunidade Azia Portuges (APCC), ne’ebé hala’o iha Sentru Konvensaun Dili (CCD), ne’ebé hahú iha Sesta, 27 Junu, no remata iha loron 29 Junu 2025.

Konferénsia APCC nian ofisialmente loke husi Prezidente Republika, Jose Ramos-Horta, no simu partisipasaun husi komunidade Luso-Azia hanesan Lifau (Oe-Cusse Ambeno), Flores, Jakarta (Indonezia), Goa (India), Malacca (Malazia), no mós Sri Lanka.

Iha loron dahuluk konferénsia ne’e nian, lansa mós asosiasaun ida ho naran Asian Portugues Communities Association (APCA), ho objetivu atu hametin liu-tán komunikasaun no kolaborasaun entre komunidade Luso-Azia sira.

Prezidente Jose Ramos-Horta hateten katak APCA sai hanesan plataforma ida atu rezolve kestaun importante sira relasiona ho edukasaun, kultura, peskiza, dezenvolvimentu ekonómiku, no internasionalizasaun lian portugés.

Prezidente Horta hateten katak konferénsia APCC ne’e importante tebes atu hanoin-hetan istória sira ne’ebé fahe ba malu no fó onra ba istória sira-ne’e ho loloos no lia-loos, no kontinua hametin solidariedade iha komunidade Luso-Azias nia laran.

APCC harii ba dahuluk iha Malacca, Malazia, iha 2016, ho objetivu atu halibur komunidade sira ne’ebé kontinua proteje liman-rohan no patrimóniu portugés iha Azia.

Konferénsia ne’e organiza husi Governu Konstitusional IX iha parseria ho Komunidade Pais sira Lian Portuges (CPLP).

Tema ba Konferensia APCC da-4 mak:

“Hamutuk iha diversidade. Dezafiu no Oportunidade sira husi Legasia Antigu”