Governu liu husi Exselensia Vise – Primeiru Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay halo abertura ba semináriu Tribunal Permanente ba Arbitrajen ho tema “Navega Investimentu Internasional no Komersial Disputa sira”.
Semináriu internasional ne’e, Governo konvida orador prinsipal nain-rua husi Tribunal Permanente Arbitrajen hanesan Garth Schofield no Martin Doe hodi fahe sira nia esperiensia no hanoin ba autor judisiariu sira iha Timor-Leste ne’ebé kompostu husi Prezidente Tribunal Rekursu, Juiz Tribunal Rekursu, Juiz Tribunal Distrital sira no Prokurador Jeral Repúblika ho nia membru Prokurador sira inklui mós advogado no defenso públiku sira partisipa hotu iha semináriu ne’e.
Iha abertura ne’e, Exselensia Vise – Primeiru Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay ho satisfasaun boot hato’o benvindu ba partisipante sira hotu iha semináriu
importante kona-ba Tribunál Permanente ba Arbitrajen.
“Ita-boot sira-nia prezensa ohin loron hatudu rekoñesimentu ba importánsia husi lei internasionál no rezolusaun pasífiku ba disputa sira ba dezenvolvimentu no estabilidade ba ita-nia rai,” Vise – Primeiru Ministru hato’o kestaun ne’e bainhira halo abertura ba semináriu Tribunal Permanente ba Arbitrajen ho tema “Navega Investimentu Internasional no Komersial Disputa sira” iha Centro Convenções de Dili (CCD), Kinta, 14 Maio 2025.
Vise – PM Hatutan, iha tinan 2024, Timor-Leste sai ona membru ba dala 123 ba Tribunal Permanente Arbitrajen, ida-ne’e marka pasu signifikativu ida iha ita-nia kompromisu iha orden urídiku internasional no adere ba iha rezolusaun pasifiku ba disputa sira.
“Pasu estratéjiku ida ne’e mosu iha momentu krusiál ida, iha ne’ebé Timor-Leste hametin ninia prezensa ekonómika internasionál, hanesan evidénsia husi ita-nia adesaun iha tinan kotuk ba Organizasaun Mundiál Komérsiu (OMK) no iha tempu badak ita-nia integrasaun ba Asosiasaun Nasaun Sudeste Aziatiku (ASEAN)”.
Timor-Leste nia partisipasaun iha Tribunál Permanent Arbitrajen la’ós de’it hametin konfiansa komunidade internasionál nan atu envolve iha atividade komersiál iha ita-nia rai, maibé oferese mós mai ita fórum úniku ida ba rezolusaun disputa sira ne’ebé envolve estadu sira, organizasaun internasional sira no entidade privada sira, liuhusi mekanizmu sira hansan arbitrajen, mediasaun, konsiliasaun no verifikasaun faktu
nian.
Hodi promove atrasaun ba investimentu estranjeiru no hametin ita-nia kuadru legál, sai imperativu tebes ba instituisaun governamentál sira, orguan judisiáriu no serbisu sira setor justisa nian, profisionál legál sira no setór emprezariál at komprende kona-ba mekanizmu sira ba rezolusaun pasifiku ba disputa internasionál sira, hanesan sira ne’ebé Tribunal Permanente Arbitrajen fornese.
“Semináriu ida-ne’e nia objetivu prinsipál mak atu aumenta ita-nia koñesimentu kona-ba papél Tribunal Permanente Arbitrajen nian, insa Timor-Leste bele asesu ho efetivu ba mekanizmu sira ba rezolusaun disputa sira – partikularmente investimentu estranjeiru no komérsiu nian, no ikusliu mak atu explora apoiu sira ne’ebé Tribunal Permanente Arbitrajen iha hanesan iha parte harmonizasaun instrument legál sira”.
Antes konklui, ha’u hakarak hatoo dala ida tan ha’ u-nia benvindu no agradesimentu ba vise-sekretáriu-jerál sira husi Tribunál Permanente Arbitrajen, Señor Garth Schofield no Señor Martin Doe, ba sira-nia prontidade no disponibilidade at fahe sira-nia esperiénsia no koñesimentu boot iha semináriu ida ne’e. Sira-nia esperiénsia iha liu-liu sira ne’ebé envolve Tratadu Tasi Timor nian no iha kazu seluk sira ne’ebé relevante internasionálmente sai valiozu ba ita hotu.
Vise – PM mós agradese ba kolaborasaun husi Gabinete Vise – PM rasik, Ministériu Justisa, Ministériu Negósiu Estranjeiru no Kooperasaun no Gabinete Primeiru-Ministru nian hodi organiza eventu importante ida ne’e.
“Ikus liu, Ha’u fiar metin katak husi seminariu ida-ne’e sei kontribui signifikativamente ba komprensaun kona-ba Tribunál Permanente ba Arbitrajen nia papel no mekanizmu rezolusaun pasifiku ba disputa internasional sira. Ha’u dezeju diskusaun ativa no interesente ba Ita-Boot sira”.