Dili, 25 Setembru 2026 —

Ministru Koordenadór ba Asuntu Ekonómiku (MKAE), liuhusi Koordenadór Jerál MKAE, Sr. Jorge Martins, simu delegasaun husi Programa Nasaun Unidas ba Dezenvolvimentu (UNDP) atu diskute kona-ba avaliasaun misaun estratéjika (Strategic Mission Review). Enkontru ne’e hala’o iha sala enkontru Gabinete MKAE nian, iha Palásiu Governu.

Objetivu husi enkontru ne’e mak atu reúne parte relevante sira ho Ekipa Revizaun Misaun Estratéjika, hodi hala’o avaliasaun no revizaun ba implementasaun prioridade estratéjika sira. Prosesu ida ne’e sei ajuda asegura katak planu estratéjiku sira lao tuir orientasaun no prioridade dezenvolvimentu nasionál.
Enkontru ne’e foka liuliu ba diskusaun kona-ba progresu implementasaun, rezultadu ne’ebé atinji ona, dezafiu sira ne’ebé hasoru, no oportunidade sira atu hadi’a efisiénsia no efetividade iha implementasaun misaun estratéjika.

Koordenadór Jerál MKAE afirma katak, “Avaliasaun periódika sai hanesan pilar importante atu garante efisiénsia, transparénsia no impaktu positivu ba komunidade sira iha Timor-Leste tomak.”
Iha enkontru ne’e, ekipa revizaun analiza situasaun no dezafiu foun sira iha terenu, ho objetivu atu foti desizaun ne’ebé loos no tuir planu estratéjiku nasaun nian.

Liuhusi enkontru ne’e, MKAE no UNDP espera bele hametin koordenasaun no kolaborasaun entre instituisaun relevante sira. Ida ne’e atu garante katak prosesu revizaun fó kontribuisaun konkretu ba dezenvolvimentu no atinjimentu prioridade estratéjika sira.