𝟏𝟑 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓

Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, iha Sábadu, loron 13 Setembru 2025, inaugura Pousada Maubisse ne’ebé lokaliza iha Postu Administrativu Maubisse, Munisípiu Ainaro.

Iha inaugurasaun Pousada Maubisse ne’e, Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, husu ba populasaun Maubisse, liu-liu komunidade sira ne’ebé hela besik atu tau matan no konserva halo didi’ak.

“Ha’u fiar ba ita bo’ot depois sei halo termo de entrega hodi entrega ba munisípiu fó ba ita-bo’ot sira jere. La’ós tanba reseita, maibé ba ha’u importante mak ita-bo’ot sira atu entrega ba sé deit bele hadomi netik fatin ida ne’e ho neon, ho fuan atu konserva ho didi’ak, no ema ida tenke iha domin duni ba natureza. Iha Pousada ne’e mós kala iha kuartu hira deit, maibe ne’e sai hanesan símbolu turístiku Ainaro nian, Flecha, Rabilau, ho buat sira seluk tan. Pousada ida ne’e kuaze tinan 100 ona,”afirma Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay.

Vise-PM esplika, Konsellu Ministru aprova tiha ona lei ida atu iha parte turizmu nian iha Timor-Leste ne’e, Ministériu Turizmu no Ambiente mak tau-matan.

“Ha’u halo tiha ona, ha’u entrega, ha’u sei tau matan nafatin, liu-liu ai-funan no ai-horis sira seluk iha fatin ida ne’e.”

Vise-PM mós enkoraja nafatin autoridade munisipál sira atu haree no konserva nafatin fatin turístiku sira ne’ebé ezisti hela iha kada munisípiu.

Iha okaziaun, Prezidente Autoridade Munisípiu (PAM) Ainaro, Manuela Georgina Carmo, agradese ba Vise-PM, MKAE, MTA, ne’ebé iha inisitiva atu hadi’a no konserva Pousada Maubisse no fatin turístiku sira seluk. Espera katak, fatin ida ne’e bele atrai vizitante sira hodi mai haree beleza Maubisse nian.

Nune’e m’os Prezidente Autoridade Munisípiu  Manufahi, Luis Marçal da Costa Tavares, ne’ebé marka prezensa mós iha inaugurasaun Pousada Maubisse ne’e, agradese ba Vise-PM, MKAE no MTA, tanba tau konsiderasaun hodi hadi’a fatin turístiku sira iha postu no munisípiu sira iha Timor laran tomak.

Iha fatin hanesan, Prezidente Banku Mundial, David Freedman, agradese ba Governu tanba bele hadi’a no konserva dadauk ona fatin turístiku  sira iha Timor-Leste.

“Ha’u haree fatin husi munisípiu Aileu, Ainaro ba tan Same, ne’e potensia dia’k tebes ba turizmu, no paizajen ne’ebé furak loos. Tanba ne’e bainhira ita jere ho di’ak, bele atrai ema husi Díli, mai husi fatin seluk atu pasiar, gasta osan, no ne’e kria empregu no fó servisu ba komunidade iha ne’e, maibé ne’e hotu depende ba jestaun. Ha’u apresu tebes ba Governu tanba atu hadi’a fatin sira ne’e.”

Banku Mundial sempre prontu atu koopera ho Governu, komunidade no mos setór privadu sira.

Vise-PM mós entrega xave ba PAM Manufahi no PAM Ainaro husi kompañia tolu husi munisípiu Ainaro no Manufahi, ne’ebé manán konkursu hodi hadi’a fatin turístiku hirak ne’e.

Iha inaugurasaun Pousada Maubisse ne’e partisipa husi Prezidente Autoridade Turizmu Timor-Leste, Virgílio Smith, PAM Ainaro, PAM Manufahi, Prezidente Banku Mundial, diretór sira, no mós kargu xefia sira husi Gabinete Vise-PM, MKAE, no MTA, entidade sira seluk no mós populasaun Maubisse.

Pousada Maubisse eziste iha tempu kolonial portugés nian, iha ne’ebé ai-funan no ai-horis balu to’o agora sei moris hela.