Governu Timor-Leste ho Governu Austrália hamutuk halo ona lansamentu ofisiál ba Konferénsia Ekonomia no Negósiu ne’ebé sei hala’o iha Centro Convenções de Díli (CCD) durante loron rua, 7-8 Agostu 2025.

Objetivu prinsipál husi konferénsia ne’e mak atu halibur investidór no emprezáriu sira entre rai-rua, Timor-Leste no Austrália tur hamutuk halo kolaborasaun ba malu atu explora oportunidade negósiu ba área poténsia sira entre rai-rua ne’ebé iha.

Kona-bá konferénsia Ekonómiku no Negósiu entre Timor-Leste ho Austrália ne’ebé halo tiha ona abertura iha salaun GMN iha Kuarta kalan, 6 Agostu, no 7 to’o 8 sei hala’o fali iha Centro Convenções de Díli (CCD).

Durante diskusaun loron rua iha Centro Convenções de Díli (CCD) ne’e, iha parte dader, Primeiru-Ministru, Kay Rala Xanana Gusmão, mak sei loke, no sei partisipa husi emprezáriu lubuk ida husi Austrália.

Governu Austrália, kolabora ho Gabinete Vise Primeiru-Ministru no Ministru Koordenadór ba Asuntu Ekonómiku, TradeInvest, no Cámara de Comércio e Indústria Timor-Leste, ho orgullu realiza Konferénsia Ekonómiku no Negósiu Timor-Leste – Austrália 2025 husi loron 7 to’o 8 Agostu iha CCD.

Eventu ne’e sei halibur líder emprezarial sira, investidór sira no membru Governu sira husi nasaun rua hodi estabelese koneksaun, kolaborasaun no esplora oportunidade sira iha setór xave ha’at: Agrikultura, Turizmu, Manufatura & Prosesamentu, Minerais & Rekursu.

Konferénsia ne’e sei iha sesaun tematíku rua iha kada loron. Iha loron dahuluk, sei foka ba turizmu no agrikultura, no loron daruak sei kobre manufatura no prosesamentu, inklui minerais no rekursu.
Loron daruak sei inklui mós painel diskusuan kona-ba Timor-Leste nia adezaun ba ASEAN.