Tibar, Likisá – 16 Janeiru 2026

Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Francisco Kalbuadi Lay, hamutuk ho Diretora Instituto Nacional de Desenvolvimentu Mão-de-Obra (INDMO), Isabel Fernandes de Lima, no instituisaun relevante sira, halo ona lansamentu ofisiál ba prosesu konstrusaun edifisiu foun INDMO nian iha Tibar, Likisá, Sesta (16/01).

Iha diskursu iha serimónia lansamentu, Vise-PM Francisco Kalbuadi Lay hateten katak konstrusaun edifisiu foun ne’e sai momentu importante ida ba INDMO no ba Estadu Timor-Leste, tanba durante tinan 17 INDMO hala’o serbisu laiha edifisiu rasik. Situasaun ne’e hatudu forsa, pasiénsia no perseveransa instituisaun nian, maski hasoru limitasaun no difikuldade barak.

“Konstrusaun edifisiu foun ne’e nu’udar prioridade Governu. Ida-ne’e hatudu ami nia kompromisu atu moderniza instituisaun públika sira, hadia administrasaun, no hametin dezenvolvimentu forsa traballu nasionál,” hateten Vise-PM. Tuir nia lian, edifisiu foun ne’e sei fó espasu servisu ne’ebé di’ak liután, hadia koordenasaun interna, no garante kondisaun adekuadu atu INDMO kumpre ninia misaun.

Vise-PM mós agradese ba instituisaun hotu-hotu ne’ebé envolve iha projetu ne’e, inklui CAFI, MOP, ADN, CNA, ANLA, Terras e Propriedades, parseiru nasionál no internasionál, setór privadu, no funsionáriu no tékniku INDMO sira ne’ebé nunca rende. Governu reafirma nia kompromisu atu kontinua halo akompañamentu ba projetu ne’e hodi garante konstrusaun ho kualidade no tuir prazus ne’ebé determina ona.
Iha momentu hanesan, Diretora INDMO, Isabel Fernandes de Lima, hateten katak serimónia ne’e la’ós de’it inisiu konstrusaun fiziku, maibé mós pasu estratéjiku ida hodi hametin sistema regulasaun, kontrolu kualidade formasaun, no sertifikasaun profisionál nasionál. Nia hatutan katak INDMO, nu’udar autoridade ba sistema TVET, iha responsabilidade atu define padraun kompeténsia, halo akreditasaun sentru formasaun sira, no garante kualidade tuir padraun internasionál.

“Edifisiu foun ne’e sei sai sentru nasionál ba garantia kualidade, no pontu ligasaun entre Governu, Indústria no Instituisaun Formasaun sira,” hateten Diretora INDMO. Nia mós subliña katak ho Timor-Leste nia prosesu integrasaun rejionál, inklui ASEAN, país presiza servisu regulatóriu ne’ebé modernu, transparente no efisiente hodi prepara forsa traballu kompetitivu.

Diretora INDMO agradese espesial ba Vise-Primeiru-Ministru ba nia lideransa no apoiu kontínuu, no destaca katak projetu ne’e tau prioridade ba konteúdu lokál, ho envolvimentu injinéru, tékniku no traballador Timor-oan sira. Kontratór BANIR LEMA UNIPESSOAL, LDA no Konsultór Supervizaun CECB Sri Lanka kompromete ona atu implementa projetu ho kualidade aas, transparênsia no responsabilidade.
Serimónia lansamentu ne’e sai símbolu perseveransa, kompromisu polítiku no esperansa ba dezenvolvimentu rekursu umanu Timor-Leste nian, no naroman ba futuru nasaun iha nivel rejionál no global.