Dili, Kuarta, 14 Janieuru 2026

Vise Primeiru-Ministériu (V-PM), Koordenadór ba Asuntu Ekonómiku (MKAE), no Ministeriu Turizmu no Ambiente (MTA), Francisco Kalbuadi Lay hasoru malu ho Prezidente RDTL, José Ramos Horta, iha Palásiu Prezidensiál, Aitarak Laran, Kuarta, loron 14 janeiru 2026 hodi hatete, katak ba oin programa ne’ebé mak aprova tiha ona hosi Parlamentu Nasionál sei kontinua la’o nafatin no mós atualiza sobre Timor-Leste nia situasaun ekonomia no mos situasaun Mundial ne’ebe mak agora akontese.

Tuir Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay , katak iha tinan 2026, tinan asaun, ne’ebe IX Governu Konstitusional konsentra liu-liu atu dudu ekonomia ba oin.

“Ha’u nia servisu mak ida ne’e, ha’u sei koordena nafatin ho Ministériu sira seluk hodi ko’alia liu kona-bá asuntu ekonomia nian, hanesan parte Agrikultura, Telekomunikasaun, Peska, Floresta no mós área sira seluk,” dehan Vise Primeiru-Ministru, Francisco Kalbuadi Lay.
Primeiru Vise-Primeiru-Ministru ne’e haktuir, kona-bá investór hira mak atu mai investe iha Timor-Leste, nia seidauk garantia hira mak atu mai, maibé nafatin buka meios hodi atrai investór sira mai investe iha Timor-Leste.
“Ha’u seidauk bele garantia investor hira, maibé halo nafatin meius para bele atrai investor sira mai iha ita nia rai, tanba prioridade agora mak ba ekonomia ne’ebé área hotu-hotu importante maibé liu-liu ita konsentra liu investimentu, hanesan Primeiro Ministru ko’alia bei-beik ona ba ita boot sira, iha tinan ida ne’e sei kria banku dezenvolvimentu nasionál ida, ne’e mós atu fasiula ita nia emprezáriu lokál sira atu dudu ekonomia la’os de’it iha nasional, maibe to’o iha baze”. Tenik dehan V-PM. ***