Dili, 23 Outubru 2025
Vise-Primeiru-Ministru Interinu, Ministru Koordenadór Asuntu Ekonómiku (MKAE), reprezenta husi Ministru Agrikultura, Pekuária, Peskas, no Floresta (MAPPF), Marcos da Cruz, ofisiálmente halo abertura ba Kompetisaun Negósiu Inovativu 2025 (KPIPN), ne’ebé organiza husi Instituto Apoio ba Dezenvolvimento Emprezaria (IADE) iha Timor Plaza, Dili.
Iha ninia observasaun, Vise-Primeiru-Ministru Interinu haktuir katak KPNI nu’udar plataforma importante ida ba joven sira hodi kanaliza sira-nia ideia no kreatividade ne’ebé bele dudu transformasaun ekonomia nasionál ba futuru ida ne’ebé inovativu no sustentável.
Durante loron tolu, finalista na’in 15 sei aprezenta sira nia ideia negósiu inovadora ba painél juis sira no iha oportunidade hodi halo rede ho atór negósiu no mos parseiru dezenvolvimentu sira. Marcos da Cruz haktuir katak ideia hirak ne’ebé mosu husi kompetisaun ne’e iha poténsia hodi hametin seguransa ai-han, kria empregu, no hasa’e valór akresentadu husi produtu lokál sira.
Iha biban hanesan, Marcos da Cruz hato’o mos apresiasaun ba IADE, parseiru governu nian, setór privadu, universidade sira, no instituisaun internasionál sira ba sira-nia apoiu hodi dezenvolve empreendedorizmu iha Timor-Leste. “Fiar iha imi nia ideia no mehi sira. Hamutuk, ita bele harii Timor-Leste ida ne’ebé inovativu no kompetitivu liu”.
