DILI, 01 Abríl 2026
Gabinete Ministru Koordenadór ba Asuntu Ekonómiku (MKAE), liuhosi Koordenadór Jerál Sr. Jorge Rui de Carvalho Martins, nomeia kargu xefia foun nain-rua (2) hodi asume responsabilidade iha estrutura orgánika MKAE nian.
Koordenador Jerál haktuir, “nomeasaun ne’e bazeia ba Dekretu Ministeriál Nú. 25/2024, loron 8 fulan-Maiu, ne’ebé estabelese orgánika MKAE nian ho objetivu atu foka liután ba efisiénsia servisu no planeamentu estratéjiku”. Sr. Leonito Soares de Jesus: Nomeia nu’udar Koordenadór Unidade Estratéjika ba Integrasaun Ekonómika, hodi substitui Sra. Licina Ramos Horta. Sra. Ivânia Gonçalves: Nomeia nu’udar Koordenadora ba Unidade Planeamentu no Koordenasaun Interministeriál ba Asuntu Ekonómiku.
Gabinete Ministru Koordenadór ba Asuntu Ekonómiku (MKAE) hato’o agradesimentu ne’ebé kle’an no rekoñesimentu aas ba Sra. Licina Ramos Horta, ba ninia dedikasaun, profisionalizmu, no boa-vontade ne’ebé boot durante asume knar nu’udar Koordenadora Unidade Estratéjika ba Integrasaun Ekonómika iha MKAE.
Liuhosi ninia kontribuisaun, Unidade refere konsege dezenvolve no lori progresu signifikativu ba dezenvolvimentu ekonómiku nasionál. Gabinete MKAE mós espera katak, ho lideransa foun, bele hatutan no hafoun servisu sira hotu, hodi asegura kontinuidade ba dezenvolvimentu ne’ebé sustentável ona.
Iha biban ne’e, Koordenadór Jerál MKAE fó delegasaun podér no baze legál ne’ebé fó ba xefe foun sira hodi ezekuta sira-nia knar: “Ha’u delega podér sira atu, tuir termu lejizlasaun ne’ebé vigora, hala’o aktu sira tuirmai ne’e, iha ámbitu Unidade nian,” haktuir Diploma refere.
Koordenadór Jerál reafirma, ba kargu xefia foun nain-rua, “knar ne’e reprezenta responsabilidade boot ida hodi kumpri dever tuir matadalan Gabinete MKAE nian. Esforsu ne’e aliña tebes ho Programa IX Governu ne’ebé implementa ona ho susesu”, konsidera katak objetivu no prioridade sentrál Governu nian mak atu kontinua progresu ne’ebé iha daudauk kona-ba dezenvolvimentu ekonómiku nasionál.
Media MAKE
