Díli, 13 Janeiru 2026
Governu Timor-Leste, liu husi Gabinete Ministru Koordenador ba Asuntu Ekonómiku (MKAE), realiza Reuniãu Koordenasaun Inter-Ministerial hodi diskute kazu investimentu ne’ebé envolve Kompañia Shayanraya, Lda no Keshavarz Great Timor Unip, Lda, relasiona ho utilizasaun rai estadu iha area Loes no Maubara, Munisípiu Likisá.
Reuniãu ne’e lidera husi Koordenador Jeral MKAE, Jorge Rui de Carvalho Martins, ho partisipasaun husi ministériu no instituisaun relevante sira, atu avalia aspetu legal, ambiental no administrativu husi kazu refere, tuir Dekretu-Lei n.º 05/2016 no enquadramentu Sistema Nasional Área Protejida (NSPA).
Governu klarifika katak investimentu empresa nian facilita tuir rekizitus legal no tékniku, no kontratu arendamentu selebra ho Ministériu da Justiça iha Maiu 2023. Nune’e, iha prosesu tuirmai, Ministériu Agrikultura no Peskás hato’o reklamasaun formal kona-ba rai estadu ne’ebé estadu atribui ba sentru treinamentu peskás.
Disputa kona-ba rai iha Loes no Maubara halo empresa hato’o lamentasaun no husu kompensasaun ba governu, tanba gastu investimentu ne’ebé afirma ona realiza.
Ho objetivu atu hetan klarifikasaun direta iha terenu, ekipa inter-ministerial realiza vizita iha 18 Dezembru 2025, no observa atividade preparasaun investimentu iha Área Protejida Monte Guguleur iha Loes, no konstrusaun iha aredór Sentru Treinamentu Peskás iha Maubara.
Governu reafirma nia kompromisu atu garante seguransa legal ba investimentu, proteje rai estadu no ambiente, no rezolve kazu ne’e tuir lei, transparénsia no prinsipiu boa governasaun.
