Gabinete Vise-Primeiru-Ministru no Ministru Koordenadór ba Asuntu Ekonómiku, liuhusi Unidade Estratéjiku ba Integrasaun Ekonómika (SUEI) – Seksaun Setór Privadu, iha kolaborasaun ho IADE, hala’o formasaun durante loron lima ho títulu “Kontabilidade: Hahú Ita-nia Negósiu” ba empreza ki’ik, médiu iha Munisípiu Bobonaro no Baucau.

Treinamentu ne’e ho objetivu atu hadi’a partisipante sira nia komprensaun kona-ba kontabilidade báziku, planeamentu negósiu, peskiza merkadu, no jestaun fluxu osan hodi permite sira jere sira-nia negósiu ho sustentavel.

Atividade ida-ne’e tuir MKAE nia monitorizasaun ba grupu 117 ne’ebé simu apoiu públiku iha 2023–2024, ne’ebé indika nesesidade atu hadi’a abilidade kontabilidade iha nivel MSME. Apoiu ida ne’e mós aliña ho polítika transferénsia públika ne’ebé hatuur iha Regulamentu Governu Nú 01/2009 no Dekretu Ministeriál Nú 01/2027/2020 kona-ba Subvensaun Públika.

Treinamentu iha Bobonaro ne’e lidera husi Diretór IADE-CDE Paulo Bonifacio ho nia ekipa, akompaña husi Herminia de Deus, Xefe Seksaun Setór Privadu MKAE. Iha Baucau, formasaun ne’e lidera husi Diretora IADE-CDE Ana Maria da Costa Freitas ho nia ekipa, akompaña husi Francisco Xavier, Xefe Unidade Monitorizasaun no Avaliasaun MKAE.
Media MCAE