Gabinete Vise-Primeiru Ministru (V-PM), no Ministru Koordenador ba Asuntu Ekonómikus (MKAE), liu husi Strategic Unit for Economic Integration (SUEI), ne’ebé realiza husi Seksaun Setor Privadu, servisu hamutuk ho Instituto ba Apoiu no Dezenvolvimentu Empresarial (IADE) fo formasaun ba grupu Setor privadu iha Munispiu Bobonaro no Baucau, durante loron lima (5) nia laran.
Objetivu husi formasaun ho topiku “KONTABILIDADE KOMESA ITA NIA NEGÓSIU” (KIN) hodi tulun negosiante mikro, ki’ik no médiu sira hodi aprende no halo diskusaun hanesan, Ideia negósiu, Peskiza merkadu, Planu komersialidade (produtu, Presu, Fatin negósiu, promosaun, kliente, Prosesu, provas fizika, Estimasaun no planu Vendas, Kalkulu Kustu no Planu Negosiu, bazea ba ida-idak nia atividade negosiu.
Husi rezultadu monitorizasaun ba atividade ezekusaun apoiu transferénsia públika tinan 2023 ho tinan 2024 nian ba grupu mikro, ki’ik no médiu ho total grupu 117, ekipa téknika husi unidade apoiu setór privadu-SUEI ho seksaun seluk iha gabinete MKAE, identifika diretamente iha terenu katak maioria grupu negosiante mikro, ki’ik no médiu sira presiza hetan kapasitasaun iha área kontabilidade atu nune’e bele tulun sira jere movimentu osan iha sira nia negósiu.
Bazea ba dadus ne’ebé husi Seksaun rekoilla katak, iha tinan 2023 no 2024 Gabinete Ministru Koordenadór ba Asuntu Ekonómiku iha fundus tranferénsia públika, fo apoiu ba grupu/empreza mikro, ki’ik no médiu sira bazeia ba decreto lei N.01/2009 no diploma ministeriál N.0 47/2022 de 9 de Novembro kona-bá apoiu subvensaun públika.
Formasaun refere realiza iha Munispiu Bobonaroi, lidera husi Diretor IADE-CDE Bobonaro, Paulo Bonifacio, hamutuk ho nia membru nain rua Elias Cardoso ho Marcos Lopes Soares no akompañia husi Xefe Seksaun Setor Privadu husi Gabinete MKAE, Herminia de De Deus. Iha Munispiu Baucau lidera husi Diretor IADE-CDE Baucau, Ana Maria da Costa Freitas hamutuk ho nia membru nain 2 mak hanesan, Luisa Carlos de Almeida, Livia Maia do Rosario Ximenes no akompañia husi Xefe Unidade Monitorizasaun no Avaliasaun husi Gabinete MKAE, Francisco Xavier.
Media MCAE