Dili, 04 Marsu 2026______
Koordenadór Jerál husi Gabinete Ministru Koordenadór ba Asuntu Ekonómiku (MKAE), Jorge Rui de Carvalho Martins, hala’o enkontru formál ho delegasaun husi Komisaun Abilidade Austrália Súl (SASC) hodi ko’alia kona-ba parseria estratéjiku ba dezenvolvimentu rekursu umanu. Diskusaun sira foka ba fó konsellu ba Ministériu Edukasaun kona-ba formasaun, kapasitasaun, no dezenvolvimentu abilidade iha Austrália Súl. Enkontru ne’e hala’o iha Salaun Reuniaun Gabinete MKAE.
Koalia iha okaziaun ne’e, Koordenador Jeral, Jorge Martins hateten:
“Nu’udar Koordenadór ba Asuntu Ekonómiku, ami fó apoiu ba atividade ekonómika liuhosi polítika ministeriál sira, inklui rejistu no asuntu regulatóriu sira. Ami nia vizaun klaru: atu estabelese fundasaun ekonomia nasionál ida ne’ebé reziliente, diversifikadu, no sustentável, ne’ebé inklui setór petróleu no gás.”
Parseria ne’e hakarak atu fasilita rekrutamentu ba aprendiz no formandu sira enkuantu asegura katak sira kompleta sira nia kualifikasaun ho susesu. Inisiativa ida-ne’e harii iha kuadru Komisaun Abilidade sira Austrália Súl nian, ne’ebé harii iha tinan 2008, ne’ebé hala’o papél sentrál ida iha supervizaun no apoiu ba sistema aprendizajen no formasaun Estadu nian.
Komisaun kolabora besik ho indústria, empregadór no parseiru formasaun sira hodi asegura katak sistema dezenvolvimentu forsa traballu nian bele hatán ho efisiente ba ezijénsia atuál no futuru nian. Aleinde ne’e, promove mos envolvimentu indústria nian, rekoñesimentu abilidade profisionál sira, no kooperasaun internasionál iha dezenvolvimentu forsa traballu.
Durante sira-nia vizita, delegasaun SASC sei vizita mós instituisaun formasaun prinsipál sira, inklui INDMO, IP, CNEFP Becora, Sentru Formasaun CNEFP Tibar, no Don Bosco – Komoro, no hasoru malu ho Diresaun-Jerál Asuntu Bilaterál ba Ázia no Oseánia.
