Díli, 17 Marsu 2026 –
Gabinete Vice-Primeiru Ministru no Ministru Koordenadór ba Asuntu Ekonómiku (MKAE), liuhusi Koordenadór Jerál, Jorge Martins, partisipa iha reuniaun téknika ho reprezentante hosi ministériu no ajénsia relevante sira hodi halo avaliasaun ba proposta investimentu husi kompanhia tolu: Emperior, S.A., Prime Timor Enterprise, Lda., no Sali-Magu Holding & Co, S.A. Reuniaun ne’e realiza iha TradeInvest Díli, ho objetivu hodi asegura katak proposta investimentu hotu-hotu aliña ho prioridade dezenvolvimentu nasionál no kuadru legal investimentu privadu.
Reuniaun ida-ne’e hanesan parte husi kompromisu estratéjiku Governu Konstitusionál Da-9 hodi aselera diversifikasaun ekonomia no hamenus dependénsia ba setór mina no gás. Governu tau prioridade ba promosaun indústria sustentável, kriasaun empregu ba foin-sa’e no komunidade rurál sira, no reforsa partisipasaun setór privadu iha atividade ekonomika. Iha oportunidade ida-ne’e, Prime Timor Enterprise, Lda. aprezenta planu investimentu ho valor US$26.4 millaun hodi dezenvolve produsaun na’an karau iha Beco, Suai (Munisípiu Covalima), ho objetivu atu hamenus importasaun, hametin seguransa alimentár, no loke oportunidade esportasaun ba merkadu rejionál hanesan Xina no Indonézia.
Komisaun Téknika garante katak prosesu avaliasaun hala’o ho rigor tuir Lei Investimentu Privadu Nú. 15/2017 no regulamentu relevante sira, inklui aplikasaun ba Deklarasaun Benefísiu (DB) no Akordu Espesiál Investimentu (AEI). Diskusaun ne’e lidera hosi Jorge Martins, ho apoiu hosi Vise Diretór Ezekutivu TradeInvest Timor-Leste, Duilio Marino Gusmão Araújo da Silva, no partisipa husi instituisaun relevante sira. Rezultadu hosi prosesu ida-ne’e sei sai baze importante ba desizaun Governu hodi apoia investimentu sira ne’ebé iha impaktu aas, sustentável no kontribui ba kresimentu ekonomia inkluzivu iha Timor-Leste.
