Haksolok tebes ohin bele hamutuk fali ho ita bo’ot sira hotu, atu selebra loron signifikante ida ba ita nia institutu públiku ne’ebé mak hala’o servisu públiku atendimentu públiku no privadu sira durante tinan sanulu resin tolu. Sira hatudu ona servisu ne’ebé mak signifikativu duni ba ita nia negosiante sira iha Timor.
Lori Sua Exeléncia Vise-Primeiru Ministru no Ministru Koordenador ba Asuntu Ekonómiku no Ministru Turizmu no Ambiente, hakarak fó parabéns ba Diretores Prezente no funsionáriu sira hotu no-mós ba sesante sira ne’ebé mak hahú iha tinan 2012 hanesan ohin temi ona to’o ohin SERVE I.P.

Sei bele nafatin sai institutu ne’ebé serve duni atu servi ita nia nasaun, servi ita nia negosiante sira iha Timor.
SERVE.IP nia misaun klaru hanesan ohin Diretór temi barak ona katak atu hafasil no lalais liután atendementu no transparente liu servisu hotu ligadu ho rezistu komérsiu iha ita nia nasaun.
Ida ne’e importante tamba ita nia polítika governu nian bolu ita atu integra ona iha merkadu globál OMK no-mós merkadu rezionál ASEAN. Polítika atu halo reforma birokrasia reforma ekonómika interligadu atu nune’e ita nia setór privadu bele hateke hetan espasu parseria internasionál no bele hafasil liután ita nia investedores sira ho hakarak atu tama diak iha Timor.

Tinan sanulu resin tolu la’os tinan ne’ebé mak ki’ik liu no la’os tinan ne’ebé mak bo’ot liu, maibé tinan ne’ebé mak bele lori institutu ne’e profisionaliza nia an sai maduru liután atu nune’e servisu sira ne’ebé mak ita halo bele mós responde ba nesesidade públiku no polítika ne’ebé mak governu ne’e trasa hela.
Iha progresu barak iha mós dezafius, lia-fuan profesionalizmu dala barak halo ema salah kaprah ho sira nia ezisténsia.

Profesionalizmu la sukat deit ho ita nia grau akadémiku, la sukat deit ho ita nia intelektualidade, maibé sukat ho ita nia étika, sukat ho ita nia intendimentu, sukat ho ita nia karakter atu serve ita nia maluk sira ho dignu no fó dignu ba ita nia an atu atende ema hotu, atu haré ema hotu nu’udar ema nu’udar umanu.

Ho nune’e deit mak hau fiar ita bele sai instituisaun ida bele serve duni interese públiku, bele serve duni polítika governu nian hodi bele halo netik buat ruma, ladiak liu maibé diak netik iha tempu ne’ebé mak ita hakna’ar an ba ita nia legadu bele husik hela ba jerasaun sira tuir mai.

Parabéns ba Diretór Ezekutivu no funsionáriu hotu, Xefe Departamentu no Diretores sira, ba progresu hirak ne’ebé mak ohin temi ona. Ita la koalia aat, la koalia diak, maibé progresu ne’ebé mak fulan sia ou tinan ida ita bo’ot sira konsege atinji.

Ne’e la signifika katak kolega sira ho maluk sira sesante la halo liu buat ida, sira mós ita tenke fó parabéns rekoñese sira nia kontribuisaun tanba ho dezafius hotu iha tempu hirak ne’eba susar teb-tebes sira bele aguenta situasaun ida mai to’o ohin loron ita sai hanesan ne’e.

MKAE halo nia papél nafatin hanesan koordenador, kordena servisu I.P.
Sira atu nune’e profesionalizmu ne’e labele hela deit ba filozofia ho liafuan. Dala ida tan lori MKAE nia naran hakarak agradese ba parte hotu ne’ebé mak tulun ona SERVE I.P.

Hahú husi inísiu to’o agora no nafatin tulun karik iha asisténsia ruma ne’ebé mak presiza favór ida koalia atu nune’e sira bele hetan atendementu ida ne’ebé mak lalais husi ita bo’ot sira no-mós ita bo’ot sira husi sira, buat hotu-hotu sei hala’o ho diak kuandu ita iha komunikasaun parte rua para bele serve objetivu ba ita nia prinsípiu sira ne’ebé ita hakarak. Obrigado no parabéns.