Governu Timor-Leste liu husi Sua Exselensia Vise-Primeiru Ministru no Ministru Koordenador ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay ho Adjuntu Diretór-Jerál Organizasaun Mundial ba Komersiu (OMK), Embaixadór Xiangchen Zhang remata tiha ona reuniaun boot tolu ne’ebé hala’o durante loron tolu tutuir malu iha Centro do Convenções de Dili (CCD).
Timor-Leste termina ona prosesu adezaun no sai ona membru plenu ba Organizasaun Mundial Komérsiu (OMK) hahu’u husi loron 31 Fulan Agostu tinan 2024.
Reuniaun loron dahuluk mak reuniaun nivel altu entre Adjuntu Diretór-Jerál OMK, Embaixadór Xiangchen Zhang hamutuk ho membru Governu IX Governu Konstitusional no membru Parlamentu Nasionál sira iha loron 10 Fevereiru 2025.
Reuniaun loron daruak, palestra públiku hamutuk ho Adjuntu Diretór-Jerál OMK, Embaixadór Xiangchen Zhang ho setor privadu, sosiadade sivil no akademiku sira iha loron 11 Fevereiru.
Reuniaun loron ikus nian ne’ebé lidera husi Koordenador Jeral MKAE, Jorge Rui de Carvalho Martins hamutuk ho Adjuntu Diretór-Jerál OMK, Embaixadór Xiangchen Zhang halo meza redonda ho parseiru dezenvolvimentu no embaixadór sira kona-ba Timor-Leste nia pós-adezaun ba OMK iha loron 12 Fevereiru 2025.
Reuniaun boot tolu ne’e, la’o ho susesu tebes, tanba hetan partisipasaun husi entidade oioin.