Vise-Primeiru-Ministru (V-PM) no Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Francisco Kalbuadi Lay hatete, tempu ona ba planeamentu atu dezenvolve setór turizmu iha Timor-Leste.

“Maibé Governu labele lao mesak, ita boot sira nia ideia, matenek no rekursu esensiél sira atu halo vizaun Estadu nian sai realidade. Ha’u enkoraja ita boot sira ida-idak atu partisipa ho ativu iha sesaun sira, forma parseira sira ne’ebé brani no foti pasu konkretu sira hodi harí insdústria Turismu ida ne’ebé buras no fó benefésiu ba Timor oan hotu,” hatete Vise-Primeiru-Ministru, Francisco Kalbuadi Lay iha Centro de Convenções de Dili (CCD).

Agora tempu atu halo asaun ba dezenvolve setór produtivu ne’e, tanba Governu atuál prontu atu kria ambiente ne’ebé bele fasilita investimentu liu husi hadia infrastrutura, rasionaliza regulamentu sira, harí parseria públiku no privadu ne’ebé metin, ne’eduni husu ba setór privadu atu mai hamutuk hodi bele halo Turismu sai motor loloos ba dezenvolvimentu inkluzivu no sustentavel.

Vise-Primeiru Ministru ne’e hatutan, tema ba Forum Turismu tinan ida ne’e mak, ho “Tempu ba Asaun.” Tema ida ne’e refleta ba determinasaun no urjensia ne’ebé tenke atua hodi loke poténsia transformativu Turizmu nian ba futuru Timor Leste nian.

Forum ida ne’e organiza husi Ministériu Turizmu no Ambiente no Gabinete Ministru Koordenadór ba Asuntu Ekonómiku ho kolaborasaun Banku Mundiál nian liu husi IFC (International Finance Corporation), hanesan eventu prinsipál ba emprezáriu lokál sira.

“Ida ne’e la’os serve deit atu atrai investimentu, maibé mos atu troka ideia no koñesimentu ne’ebé bele ajuda muda futuru setór Turismu Timor Leste nian,” dehan Vise PM.

Vise-Primeiru-Ministru reforsa tan katak, Forum Turismu ida ne’e la’os de’it atu halibur malu deit, maibé ida ne’e hanesan plataforma stratéjiku ida hodi konverte ideia sira ba parseria, no aspirasaun sira ba investimentu, ne’e mak objetivu Governu Timor-Leste nian ba fórum tinan ne’e.

Ne’eduni liu husi Forum Turismu durante diskusaun ba loron tolu mak atu haforsa kolaborasaun signifikativu entre governu, setór privadu, no parseiru dezenvolvimentu sira hodi aselera kresimentu turizmu sustentável, hodi atrai investimentu inovativu no emprendimentu negósiu sira.

“Hau hato’o agradesimentu wain ba organizador sira, parseiru sira, no partisipante hotu ba ita-boot sira nia kompromisu iha jornada ida ne’e. Mai ita aproveita momentu ida ne’e, ho konfiansa no unidade iha objetivu ida atu hodi hadia futuru turizmu Timor-Leste nian ne’ebé naroma liu,” dehan Vise PM.

Média V-PM no MKAE