Dili, 18 Marsu 2026 —

Gabinete Vice-Primeiru Ministru no Ministru Koordenador ba Asuntu Ekonómiku (MKAE), liuhusi Gabinete Koordenador Jerál, Jorge Martins, hala’o enkontru tékniku ho Unidade Planeamentu Integradu (UPI) husi Ministériu Planeamentu no Investimentu Estratéjiku (MPIE) iha Gabinete MKAE, Palásiu Governu.

Objetivu husi enkontru ne’e hodi reforça koordenasaun ba preparasaun Plano Médiu Prazu 2026–2030, ho foku espesífiku iha aliñamentu prioridade institusionál sira iha setór oioin. Parte rua ne’e subliña importánsia planeamentu ne’ebé koerente no kolaborasaun metin husi ministériu sira atu garante aliñamentu ho objetivu dezenvolvimentu nasionál no implementasaun efetivu husi polítika no programa sira. Reafirma mos kompromisu hodi hadi’a mekanismu planeamentu no integra esforsu sira ba iha kuadru médiu prazu ida ne’ebé komprensivu hodi suporta kresimentu ekonómiku sustentavel no fortalesimentu institusionál iha Timor-Leste.

Iha aprezentasaun ne’e, Koordenador Unidade Planeamentu Integradu (UPI), Epi Orleans, hato’o perspetiva importante kona-ba dezenvolvimentu ekonómiku Timor-Leste. Nia destaka nesesidade hodi dezenvolve kapasidade foun hodi transforma dezafiu sai oportunidade, ho foku ba diversifikasaun ekonómika hodi reduz dependénsia ba Fundu Petróleu. Área prioridade inklui dezenvolvimentu globál, promosaun turizmu klase mundiál, fortalesimentu agronegósiu orientadu ba eksportasaun, no hadi’a governasaun nia kuadru lejislativu hodi responde ba soberania maritima no jestaun rekursu sira liuhusi abordagem governu hotu.