Vise-Primeiru-Ministru (V-PM), Ministru Koordenadór ba Asuntu Ekonómiku (MKAE), no Ministru Turizmu no Ambiente (MTA), Francisco Kalbuadi Lay, simu vizita kortezia Embaixadora Austrália iha Timor-Leste, Caitlin Wilson, hodi ko’alia kona-bá kontinuasaun servisu sira no mós Austrália komprometidu apoiu Timor-Leste hafoin adezaun ba bloku rejionál (Association of Southeast Asian Nations) ASEAN iha fulan Outubru, tinan 2025 ne’e.
Enkontru entre Embaixadora Austrália, Caitlin Wilson ho Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, ne’e hala’o iha Gabinete Vise-Primeiru-Ministru, Farol, Díli.
Iha enkontru ne’e mós diplomata Australiana ne’e aktualiza ba Vise-Primeiru-Ministru, Fracisco Kalbuadi Lay, kona-ba forum ekonomia no negósiu Timor-Leste no Austrália, ne’ebé foin lailais hala’o iha Díli, fulan Agostu, tinan 2025 ne’e, no mós ko’alia kona-bá kapasitasaun ba traballadór timoroan sira liuhusi programa PALM (Pacific Australia Labour Mobility) no programa sira seluk tan.
Média V-PM no MKAE.
