Oecusse, loron Tersa 24 Fulan febreiru Tinan 2026
Reprezenta Gabinete Ministru Koordenador ba Asuntu Ekonómiku (MKAE), liu husi Seksaun Media no Relasaun Publikas, hodi partisipa iha serimonia atribuisaun sertifikadu ba formadu hamutuk nain 205, ne’ebé halo sira nia formasaun durante tinan 1 iha Sentru Formasaun Profesional (CFP), no inaugurasaun ba fatin Kafetaria Bansone iha Klumaria Palaban, RAEOA, Oecusse.
Tuir Sekretáriu Estadu ba Formasaun Profisionál no Empregu (SEFOPE), Rogério Araújo Mendonça L.Ed, hala’o enseramentu ba Formasaun iha área konstrusaun Jerál, Hospitalidade no Agrikultura iha Nivél I & II no abertura formasaun nivél I iha sentru formasaun Bansone RAEOA.
“Ha’u husu ba alin sira, ohin imi hetan oportunidade ida ne’e uza ho di’ak, ohin imi gradua ona iha formasaun ida ne’e no hetan sertifikadu iha nivel I no II, no iha oportunidade atu aplika ba servisu iha rai-liur no rai-laran,” dehan Sekretáriu Estadu, iha Padiae, Suku Cunha, Postu Administrativu Pante Makasar, Oecusse.
Aleinde serimonia Atribuisaun Sertifikadu, Sekretáriu Estadu Formasaun Profesional Empregu (SEFOPE), Rogério Araújo Mendonça, hamutuk ho Ministra Finansas (MF) Santina José Rodrigues. F Viegas Cardoso no Ministru Obras Públika (MOP), Samuel Marçal no Presidente Autoridade RAEOA Régio da Cruz, hala’o inaugurasaun ba fatin Kafetaria Bansone iha Klumaria Palaban no inaugura mós sala formasaun Hospitalidade iha CFP Bansone RAEOA, ne’ebé, akompania mos Diretora CNFP Becora, Bernardete Pinto Miranda Gomes, no Diretor Exekutivu CNFP Tibar, Jose Simao Tito Barreto.
Media MCAE
