Gabinete Ministru Koordenadór Asuntu Ekonómiku (MKAE), liuhosi Koordenadór Jerál, Jorge Rui de Carvalho Martins, iha parseria ho Diresaun Jerál Metrolojia Indonézia nian, lansa programa durante semana ida hodi hametin Metrolojia Jurídika iha Timor-Leste. Inisiativa, ne’ebé hala’o hosi loron 20-27 fulan-novembru iha Sentru Kulturál Indonézia nian, inklui formasaun téknika, monitorizasaun ba servisu sira rekalibrasaun nian, no apoiu ba elaborasaun regulamentu sira metrolojia nian.

Iha nia diskursu abertura, Koordenadór Jerál hato’o Governu nia apresiasaun kle’an ba Governu Indonézia nia kooperasaun ne’ebé la’o daudaun. Nia realsa, kolaborasaun ne’e la’ós de’it harii kapasidade téknika nasionál maibé mós hametin relasaun bilaterál entre nasaun rua ne’e.

Programa ne’e apoia Timor-Leste nia esforsu hodi hamenus barreira téknika ba komérsiu, hasa’e kualidade produtu, no prepara indústria lokál sira ba partisipasaun ne’ebé boot liu iha merkadu ASEAN tuir adezaun tomak nasaun ne’e nian. Koordenadór Jerál subliña katak sistema metrolojia ne’ebé forte maka importante tebes ba kompetitividade, atrasaun investimentu, no dezenvolvimentu Empreza Ki’ik no Médiu sira. Nia mós rekoñese papél importante IQTL no AIFAESA nian hodi garante kumprimentu nasionál ba kualidade, seguransa, no padraun regulatóriu sira.

Timor-Leste reafirma ninia kompromisu ba kooperasaun kontinua ho Indonézia no hato’o agradesimentu ba Embaixadór Indonézia nia apoiu sira durante nee.