25 Novembru 2025
Gabinete Ministru Koordenadór Asuntu Ekonómiku (MKAE) reafirma kompromisu maka’as Governu nian hodi hadi’a fasilitasaun investimentu durante abertura Semináriu Fasilitasaun Investimentu. Koordenadór Jerál MKAE, Jorge Rui de Carvalho Martins destaka medida foun sira atu hasa’e sertifikadu investimentu, deklarasaun benefísiu, no akordu investimentu espesiál sira.
Koordenadór salienta, IX Governu Konstitusionál tau setór privadu iha sentru dezenvolvimentu ekonómiku nasionál, Koordenadór Jerál subliña importánsia investimentu ba kriasaun empregu, redusaun pobreza, no diversifikasaun ekonómika. TradeInvest Timor-Leste kontinua halo monitorizasaun ba investidór sira-nia atividade, rezolve dezafiu sira, no fó apoiu ba empreza sira atu kumpre sira-nia kompromisu, ho investidór barak agora implementa sira-nia projetu.
Semináriu ne’e fornese plataforma ida ba koordenasaun no orientasaun ne’ebé klaru liu entre instituisaun governu sira. Koordenadór Jerál destaka mós marku ekonómiku prinsipál sira Timor-Leste nian—adezaun ba OMK iha 2024 no adezaun ba ASEAN iha Outubru 2025—ne’ebé hein atu habelar oportunidade merkadu nian ba
produtu timoroan sira.
Koordenadór Jerál hato’o fali preokupasaun husi CCITL kona-ba nesesidade ba koordenasaun téknika ne’ebé forte liu no servisu integradu hodi fó apoiu di’ak liután ba investidór nasionál no estranjeiru sira. Nia reafirma kompromisu Governu nian atu kria ambiente negósiu ida ne’ebé fó apoiu no enkoraja implementasaun responsável ba planu investimentu ne’ebé aprova ona.
Koordenadór Jerál elojia TradeInvest ba ninia profisionalizmu no husu atu kontinua servisu sira ne’ebé transparente no fasilitativu. Nia mós husu atu iha koordenasaun ne’ebé maka’as liután entre diresaun téknika sira hodi garante prestasaun apoiu investimentu nian ne’ebé efisiente.
Semináriu ne’e loke ho espetativa diskusaun ne’ebé produtivu no rezultadu iha prátika nian.
