DÍLI, 16 ABREU 2026
Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente, Francisco Kalbuadi Lay, lidera reuniaun koordenasaun husi Konsellu Nasionál Organizadór ba Prezidénsia ASEAN (ACNOC – ASEAN Chairship National Organizing Council), hodi kobre dezenvolvimentu sira relasionadu ho knaar ne’ebé Timor-Leste sei asumi iha tinan 2029.
Enkontru ne’e hala’o iha Salaun Nobre, Ministériu Negósius Estranjeirus no Kooperasaun (MNEK),
Objetivu Prinsipál husi Reuniaun ne’e atu hametin liután koordenasaun entre entidade sira Governu nain hotu ne’ebé envolve iha planeamentu Prezidénsia ASEAN. Governu hakarak garante katak iha abordajen integradu no efikás ba kestaun téknika no lójistika sira, konsiderandu relevánsia estratéjika ne’ebé eventu ne’e iha ba nível nasionál no rejionál.
Iha ninia intervensaun, Vise-Primeiru-Ministru Francisco Kalbuadi Lay, fó énfaze ba kestaun fundamentál mak, “Kolaborasaun Interministeriál ne’e Nesesidade atu servisu hamutuk hodi mobiliza rekursu sira ne’ebé apropriadu, Preparasaun Riguroza atu Asegura katak Timor-Leste prepara an ho di’ak iha aspetu hotu, hodi simu delegasaun sira husi Sudeste Aziátiku no mos Parseria Internasionál no Reforsa kooperasaun iha área krítika sira hanesan Edukasaun, Justisa, Seguransa Interna no Hospitalidade, nudar pilar ba susesu Prezidénsia nian”. Ita presiza servisu hamutuk hodi konsolida ita-nia kapasidade no garante katak Timor-Leste bele desempenha papel lideransa ne’ebé efikás no kredível iha rejiaun laran,” dehan Vise-PM.
Iha reuniaun ne’e, Vise-Primeiru-Ministru akompaña mós husi, Vise-Primeiru-Ministru, Ministru Koordenadór Asuntus Sosiais (MKAS) no Ministru Dezenvolvimentu Rurál no Abitasaun Komunitária (MDRAK), Mariano Assanami Sabino, no mos Membru Governu sira seluk ne’ebé relevante ba prosesu ne’e.
Prezensa membru Governu sira-ne’e nudar prova konkreta husi kompromisu institusionál ne’ebé boot hodi prepara nasaun ba dezafiu boot ida-ne’e, reafirma pozisaun Timor-Leste nian nudar membru foun ne’ebé prontu atu kontribui ba estabilidade no prosperidade iha ASEAN.
