Díli, 23 Marsu 2026

Governu Konstitusionál IX, liuhosi Gabinete Vice Primeiru-Ministru no Ministru Koordenadór ba Asuntu Ekonomia (MKAE), realiza enkontru Meza Redonda ho setór privadu sira iha CCD Díli, loron 23 Marsu 2026.
Atividade ida ne’e organiza liuhusi kolaborasaun ho Banku Sentral Timor-Leste (BCTL), ho objetivu hodi hametin parseria entre setór públiku no privadu hodi aselera dezenvolvimentu ekonómiku nasionál. Enkontru ne’e remata ho asinatura Nota Konkordansia entre Governu Timor-Leste—reprezenta husi Ministru Komérsiu no Indústria, Filipus Nino Pereira—no setór privadu, ne’ebé reprezenta husi Prezidente CCI-TL, Jorge Manuel Serrano.

Prioridade prinsipál sira ne’ebé konkorda ona inklui hadi’a ambiente negósiu, aumenta asesu ba finansa, promove investimentu iha setór produtivu sira, aumenta asesu ba merkadu, no hametin mekanizmu diálogu entre setór públiku no privadu. Parte rua mos reafirma sira-nia kompromisu hodi aproveita oportunidade sira husi integrasaun OMK no ASEAN hanesan motor importante ba kresimentu ekonómiku sustentavel.
Eventu ne’e mos marka ho lansamentu ofisiál relatoriu “Benefísiu Integrasaun Ekonómika ba Timor-Leste: Pasadu, Presente no Futuru”, ne’ebé dezenvolve husi ekipa MKAE ho apoiu husi Governu Austrália liuhosi Programa PROSIVU, iha kolaborasaun ho peritu husi Monash University.

Relatoriu ne’e fó hanoin konaba importansia hodi orienta desizaun politika no apoia Timor-Leste ba dezenvolvimentu inkluzivu no sustentavel.
“Ha’u hato’o agradese ba Governu Austrália, liuhosi Ekipa PROSIVU, no mos ba hau nia pesoal sira iha Ministru Koordenadór ba Asuntu Ekonomia ba sira-nia esforsu boot iha produsaun relatoriu ida ne’e,” hateten Vice Primeiru-Ministru no Ministru Koordenadór ba Asuntu Ekonomia, Francisco Kalbuadi Lay.
Enkontru Meza Redonda marka pasu importante ida hodi hametin kolaborasaun entre Governu no setór privadu, ho objetivu hametin kompromisu hamutuk hodi harii ekonomia ne’ebé kompetitivu, diversifikadu no integradu ho merkadu globál ba Timor-Leste.